అక్కడ కొబ్బరి `చెట్టే’ కాదు !

కొబ్బరి చెట్టుని `కొబ్బరి చెట్టు’ అనకుండా మరేమంటాం ! అది చెట్టే కాదంటే ఎలా ? ఇలాంటి సందేహాలు మీకీపాటికి వచ్చే ఉంటాయి. మన కోస్తాలో కొబ్బరి చెట్లు ఎక్కువగా ఉన్నట్లుగానే, పశ్చిమాన అరేబియా సముద్రతీరం వెంబడున్న గోవా తీరప్రాంతంలో కొబ్బరి చెట్లకు కొదవేలేదు. అలాంటి గోవాలో కొబ్బరి చెట్టుని అసలు `చెట్టే’కాదు పొమ్మంటున్నారు. ఎవరో అనడంకాదు, ఏకంగా గోవా ప్రభుత్వమే కొబ్బరికి ఇంతకాలంగా ఉన్న `చెట్టు’ హోదా తొలగించేసింది. ఇందుకోసం 1984నాటి చట్టాన్ని కూడా ప్రభుత్వం సవరించింది. ఇంతకీ ఎందుకింత హడావుడి… ఆ వివరాల్లోకి వెళితే…

గోవా- డయూ- డమన్ చెట్ల పరిరక్షణ చట్టం (1984)లో సవరణ చోటుచేసుకోవడంతో ఇక ఇప్పుడు కొబ్బరి చెట్టుని `ట్రీ’గా పరిగణించాల్సిన అవసరమేలేదు. గోవాలో కొబ్బరి చెట్లు బాగా పెరుగుతుంటాయి. అవి ఒక్కొసారి విరిగిపడుతుంటాయి. ఒకరింట్లో పెరుగుతున్న కొబ్బరి చెట్టు పక్క ఇంటివైపుకు వంగి పడిపోవడం చాలా సందర్భాల్లో జరుగుతుంటుంది. దీంతో పొరిగింటి కొబ్బరి చెట్టు వల్ల ఆస్తి నష్టం కలిగి లబోదిబోమన్నవారూ ఉన్నారు. ఇలాంటి అనేక ఫిర్యాదులు అధికారుల వద్ద కోకొల్లలు. కొబ్బరి చెట్టు సృష్టిస్తున్న సమస్యతో అధికారులు తలలు పట్టుకున్నారు. కొబ్బరి చెట్టుని చట్ట ప్రకారం నరకడం పెద్ద తప్పు. అది వృక్ష సంపదను నాశనం చేసిన నేరం క్రిందకు వస్తుంది. అటవిశాఖ అనుమతి లేనిదే కొబ్బరి చెట్టును ఎవ్వరూ నరకలేని పరిస్థితి.

ఈ సమస్యకు పరిష్కారం దిశగా గోవా ప్రభుత్వం చట్లంలో సవరణ తీసుకువచ్చింది. ఏదైనా ప్రమాదకరమైన పరిస్థితి తలెత్తితే గోవా వృక్ష సంరక్షణ చట్ట సవరణ ప్రకారంగానే కొబ్బరి చెట్లను తొలగించే అవకాశం ఏర్పడింది. ఇందుకోసం ప్రభుత్వం ఏకంగా కొబ్బరి చెట్టకున్న `ట్రీ’ హోదాను తొలగిస్తూ కొత్త అర్థం చెప్పింది. ఇందుకు అనుగుణంగా చట్ట సవరణ జరిగిపోయింది. ఇకపై కొబ్బరి `చెట్టు’ కాదుకనుక ఎవరైనా దాన్ని అడ్డంగా నరికేయవచ్చు. పైగా, `చెట్టు’ అంటే నిర్వచనం ఇస్తూ, పెద్ద మాను ఉండి, దానికి శాఖలు ఉంటేనే అది చెట్టు అవుతుందని తేల్చి చెప్పారు. కొబ్బరికి పెద్ద మాను ఉండదు, పైగా కొమ్మలు అసలే ఉండవు. కనుక దీనికి ఇంతకాలంగా ఉన్న చెట్టు హోదాను కూకటి వేళ్లతో సహా పీకివేశారు. అలా గోవాలో కొబ్బరి చెట్టు తన హోదాను కోల్పోయింది. సమస్య పరిష్కారమైంది.

Telugu360 is always open for the best and bright journalists. If you are interested in full-time or freelance, email us at [email protected]