తెరాస కారు జోరు మీదుంది. 12 ఎం ఎల్ సి సీట్లలో 10 గెల్చుకుని సెలెబ్రేషన్ మూడ్ లో ఉంది. ఇదే ఊపులో గేటర్ హైదరాబాద్ ను హస్తగతం చేసుకోవడానికి పావులు కదుపుతోంది. ఆరు నూరైనా మేయర్ పదవిని కైవసం చేసుకోవడానికి స్కెచ్ రెడీ అయినట్టు సమాచారం.
మొదటి నుంచీ తెరాసకు హైదరాబాద్ కొరకరాని కొయ్యగానే ఉంది. అనుకున్న స్థాయిలో కేడర్ బలపడలేదు. 2014 సార్వత్రిక ఎన్నికల్లో మూడు అసెంబ్లీ సీట్లు దక్కాయి. ఎంపీ సీటు ఒక్కటీ దక్కలేదు. అయితే, గత ఏడాదిన్నర కాలంలో అధికార పార్టీగా కాస్త బలం పుంజుకుంది. ఇతర పార్టీల నుంచి కొందరు ద్వితీయ శ్రేణి నాయకులు, కార్యకర్తలు తెరాసలో చేరారు. తలసాని వంటి నేతల వలసల కంటే ద్వితీయ శ్రేణి నాయకుల వల్లే పార్టీ బలం పెరిగిందనే టాక్ ఉంది.
హైకోర్టు తీర్పు ప్రకారం జనవరి ఆఖరు కల్లా ఎన్నికలు ముగించడానికి ప్రభుత్వం సిద్ధంగా ఉంది. అయితే, ఈసారి ఎవరు గెలుస్తారనేది రాజకీయ పార్టోల్లోనే కాదు, సామాన్య జనంలోనూ ఆసక్తికరంగా మారింది. తెరాస వర్గాల సమాచారం ప్రకారం, మేయర్ పదవిని అధికార పార్టీ గెల్చుకోవడం ఖాయమంటున్నాయి గులాబీ శ్రేణులు. అందుకోసం పక్కా లెక్కలతో పకడ్బందీ స్కెచ్ వేశారట.
దాదాపు 36 మంది ఎంపీలు, ఎమ్మెల్యేలు, ఎమ్మెల్సీలు జి.హెచ్.ఎం.సి.ని ఆప్ట్ చేసుకున్నారు. అంటే మేయర్ ఎన్నికల్లో వారంతా ఓటు వేస్తారు. తాజాగా గెలిచిన ఎమ్మల్సీలు చాలా మంది గ్రేటర్ నే ఎంచుకుంటారని తెలుస్తోంది. అంటే 40కి పైగా ఓట్లు అప్పుడే తెరాస జేబులో ఉన్నాయన్న మాట. ఏదో ఒక ఒప్పందంతో ఎం.ఐ.ఎం. కూడా తెరాసకు మద్దతిస్తుందని గులాబీ శ్రేణులు ఘంటాపథంగా చెప్తున్నాయి. డివిజన్లు, ఎమ్మెల్యేలు, ఎంపీ ఓట్లతో కలిసి ఆ పార్టీ వల్ల దాదాపు 50 ఓట్లు ఖాయమని అంచనా. అంటే 90 నుంచి 100 ఓట్లు అప్పుడే గులాబీ శిబిరానికి అడ్బాన్న్ బుకింగ్ అయినట్టే. ఇక, గ్రేటర్ ఎన్నికల్లో తెరాస ఎన్ని డివిజన్లలో విజయం సాధిస్తుందనేది ప్రశ్న. వారు అనుకున్నట్టుగా 75 గెలవకపోయినా, కనీసం 50 సీట్లు గెలవకపోయినా 30-40 మధ్య గెలిచినా మేయర్ పదవిని సునాయాసంగా గెల్చుకోవచ్చు.
ఇదీ, గులాబీ నేతలు ఆఫ్ ది రికార్డుగా చెప్తున్న మాట్. అందుకే ఆ పార్టీ టికెట్ల కోసం పోటీ భారీగానే ఉంది. డివిజన్ల వారీ రిజర్వేషన్ల ప్రకటన రాగానే టికెట్ల కోసం పెద్ద ఎత్తున దరఖాస్తులు వెల్లువెత్తే అవకాశం ఉంది. అనుకూలమైన రిజర్వేషన్ రాని నేతలు మినహాయించి, మిగతా వారిలో ప్రతి డివిజన్ నుంచి చాలా మందే టికెట్లు ఆశిస్తున్నారు. ఈ టికెట్ల పంపిణీ వ్యవహారాన్ని కేసీఆర్ తనయుడు కేటీఆర్ ప్రత్యక్షంగా పర్యవేక్షిస్తాని తెలుస్తోంది. ఇప్పటికే జరిపిన సర్వేల రిపోర్టులను క్రోడీకరించి, అన్ని అంశాలను పరిశీలించాకే టికెట్లు ఇస్తారట. ఆర్థికంగా బలవంతులతో పాటు స్థానికంగా పరిచయాలు, మంచి పేరున్న వారికి ప్రాధాన్యం లభించ వచ్చంటున్నారు. మొత్తానికి, హైదరాబాదులో తెరాస వీక్ అనే టాక్ ను పటాపంచలు చేయడానికి పక్కా స్కెచ్ రెడీగా ఉంది. దీన్ని అమలు చేయడమే తరువాయి అని తెరాస నాయకులు ధీమాగా చెప్తున్నారు. ఇంతకీ ఈ గేమ్ ప్లాన్ యథాతథంగా అమలవుతుందా లేక ఏమైనా ఊహించని ట్విస్టులు ఎదురవుతాయా వేచి చూడాల్సిందే.
