కర్ణాటకలో ముఖ్యమంత్రిని మార్చాలని.. డీకే శివకుమార్ కు పదవి ఇవ్వాలని కాంగ్రెస్ హైకమాండ్ అనుకోవడం లేదు. మల్లిఖార్జున్ ఖర్గే ఈ విషయాన్ని ఇద్దర్నీ తన ఇంటికి పిలిచి.. టిఫిన్ పెట్టి తేల్చేశారు. ఇప్పుడున్న పరిస్థితుల్లో ముఖ్యమంత్రిని మార్చలేమని .. వచ్చే ఎన్నికల తర్వాత పార్టీ మళ్లీ గెలిస్తే శివకుమార్ నే సీఎంను చేస్తామని హైకమాండ్ సందేశంగా ఖర్గే చెప్పారు. శివకుమార్ తన అసంతృప్తిని బయటపడనీయలేదు. హైకమాండ్ నిర్ణయమే శిరోధార్యమని ఆయన చెప్పారు. కానీ ముందు ముందు కర్ణాటక రాజకీయాలు కీలక మలుపులు తిరగే అవకాశం ఉంది.
నాయకుడి కోసం చూస్తున్న కర్ణాటక బీజేపీ
కర్ణాటక బీజేపీ యడ్యూరప్ప రిటైర్మెంట్ తర్వాత నాయకుడి కోసం చూస్తోంది. కొంత మంది నేతలు ఉన్నా వారు సీఎం స్థాయి వరకూ రాలేదు. గతంలో బలవంతంగా బొమ్మై లాంటి వాళ్లను ప్రయత్నించినా మిస్ ఫైర్ అయింది. ఇప్పుడు మాస్ ఇమేజ్ ఉన్న.. సమర్థుడైన నేత కోసం బీజేపీ చూస్తోంది. ఆ ప్లేస్ శివకుమార్ కు కరెక్ట్ గా సరిపోతుంది. సామాజికవర్గ సమీకరణలతో పాటు.. ప్రజల్లో ఆయనే ఆయనకు ఉన్న ఇమేజ్ .. బీజేపీ ఆలోచనలకు తగ్గట్లుగా ఉంది. పార్టీ గెలవాలంటే.. ఎలాంటి నేతలు అవసరమో బీజేపీ పెద్దలకు తెలిసినంతగా ఎవరికీ తెలియదు. అందుకే శివకుమార్ కోసం ఓపికగా ఎదురుచూస్తున్నారు.
ఇప్పటికిప్పుడు పార్టీ మారిపోతే సీఎం పదవి ఖాయం
తనను సీఎం చేయాలని కాంగ్రెస్ పార్టీ హైకమండ్ ను శివకుమార్ బతిమాలుతున్నారు. ఐదేళ్ల పాటు తాను పడిన కష్టాన్ని గుర్తించి .. పదవి ఇవ్వాలంటున్నారు. కానీ హైకమాండ్ మాత్రం తమ దయాదాక్షిణ్యాల కోసం వేచి ఉండాలని అంటోంది. కానీ శివకుమార్ ఇప్పటికిప్పుడు పార్టీకి గుడ్ బై చెప్పి.. తన వర్గం ఎమ్మెల్యేలతో మహారాష్ట్ర టైపులో ప్రత్యేకంగా ఏర్పడి తే బీజేపీ మద్దతిస్తుంది. వెంటనే సీఎం అయిపోతారు. కాంగ్రెస్ పార్టీ యాభై,అరవై మంది ఎమ్మెల్యేలకు పరిమితమవుతుంది. ఇది అక్కడి రాజకీయ సమీకరణం. ముఖ్యమంత్రి అవ్వాలనుకుంటే శివకుమార్ కు చాలా ఈజీ దారి కూడా ఇదే.
కాంగ్రెస్ పార్టీవన్నీ చెయ్యి నెత్తిన పెట్టుకునే పాలసీలే
కాంగ్రెస్ పార్టీ పాలసీలన్నీ చెయ్యి నెత్తిన పెట్టుకునే పాలసీలే. సమర్థులైన పార్టీ నేతలకు కాకుండా.. తమకు విధేయంగా ఉండి వంగి, వంగి దండాలు పెట్టేవారికే అవకాశాలు కల్పిస్తూ ఉంటుంది.దాని వల్ల సమర్థులైన నేతలు బయటకు వెళ్లిపోయి సొంత పార్టీలు పెట్టుకుంటూ ఉంటారు. ఇప్పుడు కూడా శివకుమార్ విషయంలో అదే పాలసీ పాటిస్తున్నారు. కాంగ్రెస్ పార్టీని ఎవరూ మార్చలేరని.. కన్నడ నాట సెటైర్లు పడుతున్నాయి.
