హైదరాబాద్లో విజయశాంతిరెడ్డి అనే మహిళ తన ఇద్దరు బిడ్డలతో కలిసి రైలు కింద పడి ఆత్మహత్య చేసుకున్న ఘటన అత్యంత దారుణం. ఒక తల్లి అటువంటి కఠిన నిర్ణయం తీసుకుందంటే ఆమె ఎంతటి మానసిక క్షోభను అనుభవించి ఉంటుందో ఊహించడమే కష్టం. అయితే ఈ ఘటనలో ఏదో మసాలా ఉందని చెప్పి కొన్ని మీడియా చానళ్లు ఆ కుటుంబంపై చిలువలుపలువలుగా అనుమానాలు కలిగేలా వార్తా కథనాలు ప్రసారం చేస్తూనే ఉన్నారు. ఏ సమస్యా లేకపోవడం సమస్య అన్నట్లుగా మానసిక నిపుణుల ఇంటర్యూలు కథనం చేస్తున్నారు. ఆ మహిళ ఎలాంటి పరిస్థితుల్లో ఆ నిర్ణయం తీసుకున్నారో ఆమెకే తెలుసు. నేటి మానసిక ఒత్తిళ్ల సమాజంలో.. ఎంతో మందికి ఆత్మహత్య ఆలోచనలు వస్తున్నాయి.
ఇలాంటి సమయంలో ఆమె ఆత్మహత్యకు ఇంత భారీగా ప్రచారం కల్పించి మీడియా ఎలాంటి సందేశం ఇస్తోంది. పైగా ఈ ఆత్మహత్యకు మసాలా జోడించబోతున్నారని ..పోలీసులు ఓ సంచలన విషయం చెప్పబోతున్నారని ఈ అంశాన్ని ఇంతటితో వదిలి పెట్టబోమని చెబుతున్నారు. నేటి ఆధునిక సమాజంలో మానసిక ఒత్తిళ్లు పెరిగిపోతున్న తరుణంలో, ఆత్మహత్య ఆలోచనలతో సతమతమయ్యే వారికి మీడియా ధైర్యం చెప్పాలి. కానీ, ఇలాంటి ఘటనలకు విపరీతమైన ప్రచారం కల్పించి, సంచలన విషయాలు బయటపెడతాం , పోలీసులు షాకింగ్ నిజాలు చెప్పబోతున్నారు అంటూ థ్రిల్లర్ సినిమాల్లా ప్రచారం చేయడం వల్ల సమాజానికి తప్పుడు సంకేతాలు వెళ్తున్నాయి.
చనిపోయిన వారి వ్యక్తిగత జీవితాలను చీలుస్తూ, వారి బంధువులను కెమెరాల ముందు నిలబెట్టి ప్రశ్నలతో వేధించడం మంచిది కాదు. పోలీసులు కేసు దర్యాప్తు చేస్తున్న సమయంలోనే, సమాంతర విచారణలు జరుపుతూ ఆ కుటుంబ సభ్యులను నేరస్తుల్లా చిత్రించడం మానవత్వం అనిపించుకోదు. బాధితుల వేదనను టీఆర్పీ రేటింగ్ల కోసం వాడుకోవడం జర్నలిజం విలువలను దిగజార్చడమే. వార్తా సేకరణలో కనీస నైతికతను పాటించకుండా, మసాలా కోసమే పాకులాడటం వల్ల సమాజంలో మీడియాపై ఉన్న గౌరవం నశిస్తోంది.
ఇప్పటికైనా మీడియా సంస్థలు ఆత్మ విమర్శ చేసుకోవాల్సిన అవసరం ఉంది. ఓ కుటుంబం కూలిపోయినప్పుడు ఆ కుటుంబం ఎదుర్కొనే దుఃఖాన్ని గౌరవించడం నేర్చుకోవాలి. ఆత్మహత్యలను గ్లామరైజ్ చేయకుండా, నివారణా చర్యలపై అవగాహన కల్పించడమే బాధ్యతాయుతమైన మీడియా లక్ష్యం కావాలి. మనుషుల ప్రాణాలతో, వారి కన్నీళ్లతో టీఆర్పీ గేమ్ ఆడటం ఆపి, బాధితులకు అండగా నిలిచే మానవత్వాన్ని చాటాలి. అప్పుడే మీడియా తన పవిత్రమైన విధిని నిర్వర్తించినట్లు అవుతుంది.
