‘ఆర్.ఆర్.ఆర్’ త‌ర‌వాత రామ్ చరణ్ సినిమా ఏమిట‌న్న‌ది ఇంకా ఫిక్స్ కాలేదు. కాక‌పోతే చరణ్ ముందు రెండు ఆప్ష‌న్లున్నాయి. ఓ ఆప్షన్ అయితే.. `జెర్సీ`తో ఆక‌ట్టుకున్న గౌత‌మ్ తిన్న‌నూరి. ఇప్ప‌టికే… ఇద్ద‌రి మ‌ధ్యా ప‌లు మార్లు భేటీ జ‌రిగింది కూడా. యూవీ క్రియేష‌న్స్ సంస్థ ఇది వ‌ర‌కే.. గౌత‌మ్ కి అడ్వాన్స్ ఇచ్చింది. ఈ క‌థ గ‌నుక ఓకే అయితే… యూవీలోనే చరణ్ – గౌత‌మ్ ల సినిమా ఉంటుంది.
ఇక రెండో ఆప్షన్.. వెంకీ కుడుముల. ఛ‌లో, భీష్మ సినిమాల‌తో ఆక‌ట్టుకున్నాడు వెంకీ కుడుముల. ఓ స్టార్ హీరోతో సినిమా చేయాల‌న్న‌ది వెంకీ కుడుముల ప్ర‌య‌త్నం. మహేష్ కోసం ఓ క‌థ సిద్ధం చేసుకున్నాడు వెంకీ. కానీ.. కుద‌ర్లేదు. ఇప్పుడు చ‌ర‌ణ్‌తోనూ ట‌చ్‌లో ఉంటున్నాడు. రెండు క‌థ‌లూ.. చ‌ర‌ణ్‌కి బాగా న‌చ్చాయ‌ని, ఇందులో ఓ సినిమా ప‌ట్టాలెక్క‌డం ఖాయ‌మ‌ని తెలుస్తోంది. `ఆర్.ఆర్.ఆర్` త‌ర‌వాత.. బ‌డా ద‌ర్శ‌కుల‌తో కాకుండా.. యువ‌త‌రంతో ప‌ని చేయాల‌న్న‌ది చరణ్ ఉద్దేశం. `మ‌గ‌ధీర` త‌ర‌వాత కూడా చరణ్ అదే చేశాడు. అంచ‌నాలు త‌గ్గించ‌డానికి `ఆరెంజ్‌` అనే ప్రేమ‌క‌థ‌ని ఎంచుకున్నాడు. ఫ‌లితంలో తేడా వ‌చ్చినా.. చరణ్ స్ట్రాట‌జీ మాత్రం స‌రైన‌దే. ఇప్పుడు కూడా చరణ్ అదే బాట‌లో న‌డ‌వ‌బోతున్నాడు. కాక‌పోతే.. ఈ ఇద్ద‌రు ద‌ర్శ‌కుల‌లో ఎవ‌రికి ల‌క్కీ ఛాన్స్ దక్కుతుంద‌న్న‌ది మాత్రం స‌స్పెన్స్‌.
