ఈనెల 16న రావాల్సిన సింగం 3.. ధృవ ఎఫెక్ట్‌తో ఓ వారం రోజులు ఆల‌స్యంగా వ‌ద్దామ‌నుకొంది. డిసెంబ‌రు 23న సింగం 3 రిలీజ్ అవ్వ‌డం ఖాయ‌మ‌ని అనుకొన్నారు. అయితే… చిత్ర‌బృందం మాత్రం ఇంకొంచెం స‌మ‌యం తీసుకోవాలని భావించింది. అందుకే.. మ‌రోసారి సింగం 3ని వాయిదా వేసింది. చెన్నైలో వ‌ర్షాల కార‌ణంగానూ, పెద్ద నోట్ల ర‌ద్దుతోనూ ఈ సినిమా వాయిదా ప‌డింద‌ని చెప్పుకొన్నారు. ఇప్పుడు సింగం 3 కొత్త రిలీజ్ డేట్ వ‌చ్చింది. 2017 జ‌న‌వ‌రి 26న ఈ సినిమాని విడుద‌ల చేయాల‌ని చిత్ర‌బృందం నిర్ణ‌యం తీసుకొంది.
సూర్య క‌థానాయ‌కుడిగా న‌టించిన సింగం కి హ‌రి ద‌ర్శ‌కుడు. వీరిద్ద‌రి క‌ల‌యిక‌లో వ‌చ్చిన సింగం, సింగం 2 మాస్‌ని మెప్పించాయి. బాలీవుడ్‌లోనూ రీమేక్ రూపంలో వెళ్లి ఘ‌న విజ‌యం సాధించాయి. అందుకే సింగం 3పై అంచ‌నాలు భారీగా పెరిగాయి. ప్ర‌చార చిత్రాలు, అందులో సూర్య గెట‌ప్ అభిమానుల్ని ఆక‌ట్టుకొన్నాయి. ట్రైల‌ర్ అయితే యూ ట్యూబ్‌లో రికార్డులు సృష్టించింది. అనుష్క, శ్రుతిహాస‌న్‌లు క‌థానాయిక‌లుగా న‌టించారు. వారిద్ద‌రి గ్లామ‌ర్, హ‌రి టేకింగ్‌ ఈ చిత్రానికి ప్ర‌ధాన ఆక‌ర్ష‌ణ‌గా నిల‌వ‌బోతున్నాయి. ఈయేడాది 24తో సూర్య ఓ సూప‌ర్ హిట్‌ని త‌న ఖాతాలో వేసుకొన్నాడు. 2017నీ హిట్ సినిమాతోనే మొద‌లెడ‌తాడేమో చూడాలి.
