నిజం చెప్పారో సంగతి చూస్తా..! అనే బెదిరింపులు ఇప్పుడు కామన్. అది మీడియా , సోషల్ మీడియా మాత్రమే కాదు.. ప్రభుత్వ ఉద్యోగులకూ తప్పడం లేదని సచివాలయంలో గుసగుసలు వినిపిస్తున్నాయి. ప్రభుత్వ అప్పుల లెక్కలు తేల్చడానికి కాగ్ బృందం ఏపీలోకి వచ్చింది. వారు మొత్తం అవకవతవకలపై వివరాలు సేకరిస్తున్నారు. ముఖ్యంగా అప్పుల లెక్కలు తీస్తున్నారు. ఇలా ఆరా తీస్తున్న అధికారులతో… ఖజానా గల్లాపెట్టేను దగ్గర పెట్టుకున్న ఉన్నతాధికారులు బెదిరింపులకు దిగారట. దీంతో సచివాలయంలో గందరగోళం ఏర్పడింది. దాదాపుగా వారం రోజుల కిందట జరిగిన ఈ వ్యవహారం తర్వాత కాగ్ అధికారులు అప్పులపై మరింత నిశితంగా పరిశీలన జరుపుతున్నట్లుగా సచివాలయ వర్గాలు చెబుతున్నాయి.
మరో వైపు ఆర్థిక శాఖ అధికారులందర్నీ కూర్చోబెట్టి… దృశ్యం సినిమాలో వెంకటేష్ చెప్పినట్లుగా .. మన అప్పులు ఇంతే.. ఇంతకు మించి మనం ఒక్క పైసా తీసుకోలేదు.. ఏమి అడిగినా ఏమీ తెలియదనే చెప్పాలని.. క్లాస్ తీసుకున్నట్లుగా గుసగుసలు వినిపిస్తున్నాయి. కాదు కూడదని ఎవరైనా నిజం చెప్పారో .. వచ్చే నెల నుంచి జీతాలు రావని వారికి ఉన్నాతాధికారులు బెదిరిస్తున్నారట. తప్పుడు లెక్కలు ఇస్తే ఇవాళ కాకపోతే తాము ఇరుక్కుపోతామని ఉద్యోగులు వణికిపోతూంటే.. చెప్పొద్దని ఉన్నతాధికారలే ఒత్తిడి చేస్తున్నారు. ఇది ఆర్థిక శాఖలో ఇప్పుడు క్లిష్టమైన సమస్యగా మారింది.
ఇప్పటికే ఏపీ ప్రభుత్వం ఈ ఆర్థిక సంవత్సరంలో తీసుకోవాల్సిన అప్పుల పరిమితి పూర్తయింది. ప్రస్తుత ఆడిట్ జరిగితే… ఇక కేంద్రాన్ని బతిమాలి అదనపు అప్పులు తీసుకోవడానికి కూడా అవకాశం ఉండదు. అందుకే వీలైనంత తక్కువ అప్పులు తీసుకున్నట్లుగా చూపించాలని అనుకుంటున్నారు. తమ వాదనకు అంగీకరించేలా పై స్థాయి నుంచి ఒత్తిడి తెచ్చేందుకు వైసీపీ పెద్దలు ఢిల్లీ స్థాయిలో ప్రయత్నాలు చేస్తున్నారని అంటున్నారు. అయితే .. ప్రస్తుతం సచివాలయంలో జరుగుతున్న కాగ్ ఆడిట్ .. బెదిరింపుల వరకూ వెళ్లడమే అందర్నీ ఆశ్చర్య పరుస్తోంది.
