భారత రాజకీయాల్లో నియోజకవర్గాల పునర్విభజన ప్రక్రియ ఒక కీలక మలుపుగా మారుతోంది. జనాభా ప్రాతిపదికన సీట్ల కేటాయింపు జరిగితే, దశాబ్దాలుగా జనాభా నియంత్రణను సమర్థవంతంగా అమలు చేసిన దక్షిణాది రాష్ట్రాలకు అన్యాయం జరుగుతుందనే ఆందోళన వ్యక్తమవుతోంది. అయితే కేంద్రం మాత్రం ఎలాంటి అన్యాయం జరగదని హామీ ఇస్తోంది. ముఖ్యంగా, లోక్‌సభలో దక్షిణాది రాష్ట్రాలకు ఉన్న ప్రస్తుత 24 శాతం వాటా తగ్గకుండా చూసేలా ప్రో-రాటా పద్ధతిని అనుసరించే అవకాశం కనిపిస్తోంది. అంటే, మొత్తం సీట్ల సంఖ్య పెరిగినప్పటికీ, రాష్ట్రాల మధ్య బలాబలాల నిష్పత్తిలో మార్పు లేకుండా సీట్లను పెంచడమే దీని ఉద్దేశం. ముఖ్యమంత్రి చంద్రబాబు కేంద్రం నుంచి ఇదే భరోసా పొందారు.

దక్షిణాది పర్సంటేజీ తగ్గదు!

రాజకీయంగా ఈ నిర్ణయం అత్యంత సున్నితమైనది. ఉత్తరాది రాష్ట్రాలకు అధిక ప్రాధాన్యత ఇస్తూ దక్షిణాదిని విస్మరిస్తే, దేశంలో ప్రాంతీయ అసమానతలు పెరిగి దక్షిణ భారత గళం వేరుగా వినిపించే ప్రమాదం ఉందని కేంద్రానికి తెలుసు. ఒకవేళ కేవలం జనాభానే ప్రామాణికంగా తీసుకుంటే, ఉత్తరప్రదేశ్ వంటి రాష్ట్రాల ప్రాబల్యం పెరిగి, దేశ విధాన నిర్ణయాల్లో దక్షిణాది రాష్ట్రాల ప్రభావం నామమాత్రంగా మారిపోతుంది. ఇది కేవలం రాజకీయ నష్టం మాత్రమే కాదు, దేశ సమగ్రతకు కూడా సవాలుగా మారే అవకాశం ఉండటంతో, బీజేపీ నేతృత్వంలోని కేంద్ర సర్కారు ఆచితూచి అడుగులు వేస్తోంది.

అన్యాయం జరిగితే బలంగా ఉద్యమం

దక్షిణాదిలో ప్రాంతీయ పార్టీల బలం ఎక్కువ. నియోజకవర్గాల విభజనలో ఏమాత్రం తేడా వచ్చినా, ఈ పార్టీలు దానిని ప్రాంతీయ అస్తిత్వ పోరాటంగా మలిచే అవకాశం ఉంది. ఇప్పటికే తమిళనాడు, కేరళ, తెలంగాణ , ఆంధ్రప్రదేశ్ వంటి రాష్ట్రాల్లో డీలిమిటేషన్‌పై చర్చలు తీవ్రరూపం దాల్చాయి. అభివృద్ధి చెందిన రాష్ట్రాలను శిక్షిస్తారా అనే ప్రశ్నను ప్రజల్లోకి బలంగా తీసుకెళ్లేందుకు ప్రాంతీయ పార్టీలు సిద్ధంగా ఉన్నాయి. ప్రజలు కూడా అభివృద్ధిని, తమ రాజకీయ ప్రాతినిధ్యాన్ని ముడిపెట్టి చూస్తున్నారు కాబట్టి, ఏ చిన్న పొరపాటు జరిగినా అది కేంద్రంపై తిరుగుబాటుగా మారే ప్రమాదం ఉంది.

ప్రోరాటా ప్రకారం కేటాయిస్తే సమస్యలుండవు!

ఇలాంటి పరిస్థితుల్లో పెరగబోయే సీట్లను అన్ని రాష్ట్రాలకు దామాషా పద్ధతిలో కేటాయించడం ద్వారా ఈ సంక్షోభాన్ని నివారించాలి. తద్వారా అటు మహిళా రిజర్వేషన్లు అమలు చేయడానికి వీలవుతుంది, ఇటు ఎస్సీ, ఎస్టీ రిజర్వ్‌డ్ స్థానాలూ పెరుగుతాయి. అన్నింటికీ మించి దక్షిణాది రాష్ట్రాల ప్రాముఖ్యత తగ్గకుండా ఉంటుంది. దేశంలోని భిన్నత్వాన్ని కాపాడుకుంటూనే, సమాన ప్రాతినిధ్యాన్ని కల్పించడమే డీలిమిటేషన్ ముందున్న అతిపెద్ద సవాలు. కేంద్రం తీసుకునే ఈ జాగ్రత్తలే భారత భవిష్యత్తు రాజకీయ గమనాన్ని నిర్దేశించనున్నాయి.