దేవాదాయ శాఖలో అత్యంత వివాదాస్పద అధికారిణిగా పేరున్న కళింగిరి శాంతిని ఏసీబీ అధికారులు అరెస్ట్ చేశారు. రెండు రోజులుగా విజయవాడ, తాడేపల్లిలోని ఆమె నివాసాల్లో జరిపిన సోదాల్లో భారీగా అక్రమాస్తులు గుర్తించినట్లు అధికారులు ధృవీకరించారు. ఆదాయానికి మించిన ఆస్తుల కేసులో పక్కా ఆధారాలు సేకరించిన అనంతరం, ఆమెను అదుపులోకి తీసుకుని ఏసీబీ కార్యాలయానికి తరలించారు.

శాంతి నివాసాల్లో జరిపిన తనిఖీల్లో సుమారు 50 కోట్లకు పైగా విలువైన స్థిరాస్తుల పత్రాలు, భారీగా బంగారం, భారీగా నగదు లభించినట్లు తెలుస్తోంది. తన సర్వీసు కాలంలో అధికార దుర్వినియోగానికి పాల్పడి, బినామీల పేర్లతో భారీగా ఆస్తులు కూడబెట్టారని ఏసీబీ ప్రాథమిక విచారణలో తేలింది. ముఖ్యంగా గత ప్రభుత్వ హయాంలో ఒక కీలక నేత అండదండలతో ఆమె అడ్డగోలుగా వ్యవహరించారనే ఆరోపణలు ఉన్నాయి.

గతంలోనే ఆమెపై వచ్చిన అవినీతి ఆరోపణలు నిరూపితమై, ఆమెను సర్వీసు నుంచి తొలగించాలన్న ఫైల్ ప్రభుత్వం వద్ద పెండింగ్‌లో ఉంది. అయితే, ఆమె కోర్టు ద్వారా స్టే తెచ్చుకుని తిరిగి విధుల్లో చేరారు. విధుల్లో చేరిన కొద్ది రోజులకే ఏసీబీ పంజా విసిరింది. న్యాయపరంగా తప్పించుకునేందుకు ఆమె చేసిన ప్రయత్నాలన్నీ తాజా అరెస్టుతో నీరుగారిపోయాయి. అధికారికంగా ఆమెపై క్రిమినల్ కేసులు నమోదు చేసి రిమాండ్‌కు తరలించేందుకు అధికారులు సిద్ధమయ్యారు.

శాంతి అరెస్ట్ కేవలం ఒక అధికారిణికి సంబంధించినది మాత్రమే కాకుండా, రాజకీయంగా కూడా ప్రకంపనలు సృష్టిస్తోంది. రాజ్యసభ సభ్యుడు విజయసాయిరెడ్డికి ఆమె అత్యంత సన్నిహితురాలని, ఆయన సూచనల మేరకే పలు అక్రమాలకు పాల్పడ్డారన్న ఆరోపణలు ఉన్నాయి.