బాలీవుడ్‌లో ఘ‌న విజ‌యం సాధించిన చిత్రం ‘విక్కీ డోనర్’. తెలుగులో ఈ చిత్రాన్ని నరుడా – డోన‌రుడా పేరుతో రీమేక్ చేశారు. సుమంత్ క‌థానాయ‌కుడు. ప‌ల్లవి సుభాష్ క‌థానాయిక గా న‌టించిన ఈ చిత్రానికి మ‌ల్లిక్ రామ్ ద‌ర్శకుడు. ట్రైలర్ మహేష్ బాబు చేతుల మీదుగా విడుదలైంది. బాలీవుడ్ సినిమా చూసిన వాళ్లకు ట్రైలర్… ట్రూ కాపీ అనిపించొచ్చు. కానీ.. విక్కీ డోనర్ ప‌రిచ‌యం లేనివాళ్లకు నరుడా – డోన‌రుడా ట్రైలర్ హిలేరియ‌స్‌గా అనిపిస్తుంది. బాలీవుడ్ సినిమాలో హీరో పేరు విక్కీ. రీమేక్‌లోనూ హీరోకి అదే పేరు పెట్టేశారంటే… మ‌నోళ్లు ఎంత కొత్తగా ఆలోచించారో అర్థమ‌వుతుంది. అయితే.. ఈ సినిమా కేవ‌లం ఎంట‌ర్‌టైన్‌మెంట్‌ని మాత్రమే న‌మ్ముకొంద‌న్న విష‌యం ట్రైలర్ చూస్తే అర్థమ‌వుతుంది.
సుమంత్ నోటి నుంచి వ‌చ్చిన డైలాగులు త‌క్కువే. సింహ‌భాగం త‌నికెళ్ల భ‌ర‌ణివే వినిపిస్తాయి. ప‌ల్లవి సుభాష్ స్ర్కీన్ ప్రెజెన్స్ అంతంత మాత్రంగా అనిపిస్తోంది. ఇక సిల్వర్ స్ర్కీన్‌పై ఎలా ఉండ‌బోతోందో?? హీరో క్యారెక్టరైజేష‌న్‌ని బ‌య‌ట పెట్టిన ఈ ట్రైలర్.. ‘సినిమా ఓసారి చూడొచ్చు’ అనే భ‌రోసా క‌లిగిస్తోంది. అది చాలు.. సుమంత్‌కి ఓ స‌క్సెస్ ద‌క్కడానికి. పాపం… చాలా కాలం నుంచి హిట్టు కోసం విశ్వప్రయ‌త్నాలు చేస్తున్నాడు సుమంత్. ఈ రీమేక్ అయినా.. సుమంత్ క‌ల ఫ‌లించేలా చేస్తుందేమో చూడాలి. అక్టోబ‌రు నెలాఖ‌రున ఈ చిత్రాన్ని విడుద‌ల చేసే అవ‌కాశం ఉంది.
