ఏపీ ప్రభుత్వం ముఖ్యంగా సీఎం చంద్రబాబునాయుడు తన విజన్ ప్రకటించి దాని ప్రకారం నిర్ణయాలు తీసుకుంటూ పోవడం వైసీపీకి నచ్చడం లేదు. ప్రజలు పదేళ్లకే అధికారం ఇచ్చారు. ఆ ఐదేళ్లలో చేయగలిగిన పనులే చేయాలి..ఇంకేం చేయకూడదని వాదిస్తున్నారు. రాజధాని 30, 40 ఏళ్లు అయినా పూర్తి కాదంటున్నారు. అసలు ఏ నగరం అయినా పూర్తయిందా..?. అభివృద్ధి అనేది నిరంతర ప్రక్రియ . అది వారికి అర్థం కావడం లేదు. తమ విషాన్ని నింపుకుంటూనే ఉన్నారు.

వైసీపీ ఆడింది విధ్వంస రాజకీయ , పరిపాలనా ఆట

రాజకీయాల్లో పదవి అనేది ఒక తాత్కాలిక అవకాశం మాత్రమే, కానీ పరిపాలన అనేది తరతరాలకు పునాది వేసే ప్రక్రియ. ఒక సాధారణ రాజకీయనాయకుడు తదుపరి ఎన్నికల గురించి ఆలోచిస్తే, ఒక నిజమైన నాయకుడు రాబోయే తరాల భవిష్యత్తు గురించి ఆలోచిస్తాడు అన్న మాటకు నేటి ఆంధ్రప్రదేశ్ రాజకీయ పరిణామాలు అద్దం పడుతున్నాయి. ప్రజాస్వామ్యంలో ఏ ప్రభుత్వానికైనా ఐదేళ్ల కాలపరిమితి ఉంటుంది, కానీ ఆ ప్రభుత్వం తీసుకునే నిర్ణయాలు మాత్రం దశాబ్దాల ప్రభావాన్ని చూపిస్తాయి. వైసీపీ హయాంలో మళ్లీ గెలవడానికి సరిపడా వ్యూహాలు ఉంటే చాలు అనే ధోరణి స్పష్టంగా కనిపించింది. రాబోయే 20-30 ఏళ్లలో రాష్ట్రం ఎటు వెళ్లాలి? యువతకు ఉపాధి ఎలా కల్పించాలి? అనే దీర్ఘకాలిక లక్ష్యాల కంటే, తక్షణమే ఓట్లు రాల్చే పథకాలకే పెద్దపీట వేశారు. ఇది ఒక రకంగా రాష్ట్ర భవిష్యత్తును పణంగా పెట్టి చేసిన తాత్కాలిక రాజకీయ జూదం ఆడారు. రాష్ట్ర, యువత భవిష్యత్ ను పణంగా పెట్టారు.

సంక్షేమం పేరుతో అభివృద్ధి విస్మరణ

సంక్షేమం అనేది పౌరుల జీవన ప్రమాణాలను పెంచడానికి తోడ్పడాలి తప్ప, కేవలం రాజకీయ లబ్ధికి సాధనం కాకూడదు. వాలంటీర్ల వ్యవస్థ, పథకాలకు రంగులు వేయడం, ప్రతిచోటా నాయకుడి బొమ్మలు ముద్రించుకోవడం వంటివి ప్రచారానికి పనికొచ్చాయే తప్ప, రాష్ట్రానికి శాశ్వత ఆస్తులను సృష్టించలేకపోయాయి. కేవలం పప్పు బెల్లాలు పంచడం ద్వారా ఓటర్లను ఆకట్టుకోవచ్చనే భ్రమలో ఉండి, పారిశ్రామికాభివృద్ధిని, మౌలిక సదుపాయాల కల్పనను విస్మరించడం వల్ల నేడు యువత ఉపాధి కోసం ఇతర రాష్ట్రాల వైపు చూడాల్సిన పరిస్థితి ఏర్పడింది.

అప్పుల ఊబిలో భావితరాలు

నిజమైన నాయకత్వం అంటే ఉన్న వనరులను సమర్థవంతంగా వాడుతూ సంపదను సృష్టించడం. కానీ, అన్నిటినీ అమ్మేసి, భారీగా అప్పులు తెచ్చి, ఆ సొమ్మును కేవలం పంపిణీకి వాడటం భవిష్యత్తుపై తీవ్ర ప్రభావం చూపుతుంది. నేడు చేస్తున్న అప్పులకు రేపు పుట్టబోయే బిడ్డలు వడ్డీలు కట్టాల్సి రావడం దారుణం. భవిష్యత్తు అవసరాల కోసం మూలధన వ్యయం చేయకుండా, కేవలం రెవెన్యూ వ్యయానికే పరిమితమవ్వడం వల్ల రాష్ట్ర ఆర్థిక వ్యవస్థ ఛిన్నాభిన్నమైంది. ఐదేళ్లలో అదే జరిగింది. ఇప్పుడు చంద్రబాబు గాడినా పెడుతున్నారు.

సమన్వయమే అసలైన రాజకీయం

ప్రస్తుత పరిస్థితులను చక్కదిద్దుతూనే, భావితరాలకు మెరుగైన జీవితాన్ని అందించడమే ప్రజా రాజకీయం . నేటి అవసరాల కోసం సంక్షేమ పథకాలను అమలు చేస్తూనే, రేపటి కోసం పరిశ్రమలు, ఐటీ హబ్‌లు, సాగునీటి ప్రాజెక్టులను నిర్మించడం ఒక సమర్థవంతమైన నాయకుడి లక్షణం. ఇప్పుడు అదే జరుగుతోంది. భవిష్యత్తు గురించి ఆలోచించని ఏ పార్టీ అయినా కాలగర్భంలో కలిసిపోతుందనేది చరిత్ర చెబుతున్న సత్యం. ఓట్ల కోసం చేసే రాజకీయం కేవలం గెలుపునిస్తుంది, కానీ ప్రజల కోసం చేసే రాజకీయం చరిత్రను సృష్టిస్తుంది. ప్రజలు ఇప్పుడు తెలివైన వారు. కేవలం ఉచిత పథకాలతో సరిపెట్టుకోకుండా, తమ పిల్లల భవిష్యత్తును ఎవరు తీర్చిదిద్దగలరో గమనిస్తున్నారు. కానీ గుణపాఠం నేర్చుకోవాల్సిన వైసీపీనే నేర్చుకోవడం లేదు.