వైసీపీ రాజకీయ ప్రయాణంలో ఒక విచిత్రమైన ధోరణి కనిపిస్తుంది. తమను తాము బలమైన ప్రాంతీయ శక్తిగా చెప్పుకుంటూనే, ఆపద వచ్చినప్పుడల్లా బీజేపీ మా వెనుక ఉంది, బీజేపీ మమ్మల్ని కాపాడుతుంది అనే సంకేతాలను ప్రజల్లోకి పంపడం ఆ పార్టీకి అలవాటుగా మారింది. తాజాగా తిరుమల లడ్డూ వివాదంలోనూ బీజేపీ అగ్రనాయకత్వం తమపై తీవ్ర స్థాయిలో విరుచుకుపడటం లేదనే విషయాన్ని వైసీపీ శ్రేణులు ఒక రక్షణ కవచంగా ప్రచారం చేసుకుంటున్నాయి.
బీజేపీ అండతోనే ఏమీ జరగడం లేదని ప్రచారం
వైసీపీ అధినేత జగన్ మోహన్ రెడ్డి ప్లాన్ చాలా స్పష్టంగా కనిపిస్తోంది. తనపై ఉన్న పాత కేసులు, వివేకా హత్య కేసు నుంచి మొదలుకొని తాజా స్కామ్ల వరకు దర్యాప్తు సంస్థల వేడి తగలకుండా ఉండటమే ఆయన ప్రథమ లక్ష్యం. దీని కోసం తన రాజకీయ క్యారెక్టర్ పణంగా పెట్టడానికి కూడా ఆయన వెనకాడటం లేదు. జైలు శిక్ష నుంచి తప్పించుకోవడమే పరమావధిగా సాగుతున్న ఈ రాజకీయాల్లో, ప్రజాక్షేత్రంలో తమ విశ్వసనీయత దెబ్బతింటుందనే భయం కంటే, కేంద్ర పెద్దల అండ ఉందనే భరోసానే ఆ పార్టీకి ఎక్కువగా అవసరమవుతోంది.
బీజేపీతో కలుస్తామని చెప్పగలరా?
నిజానికి బీజేపీకి వైసీపీని కాపాడాల్సిన రాజకీయ అవసరం ఏమాత్రం లేదు. ఓటు బ్యాంక్ సమీకరణాల పరంగా చూస్తే, వైసీపీ మద్దతుదారులు , బీజేపీ సిద్ధాంతాలు పరస్పర విరుద్ధం . ఒకవేళ జగన్ ఎప్పుడైనా నేరుగా బీజేపీతో పొత్తు ప్రకటిస్తే, ఆయనకున్న మైనారిటీ, ఇతర సంప్రదాయ ఓటు బ్యాంక్ తక్షణమే దూరమయ్యే ప్రమాదం ఉంది. ఈ విషయం తెలిసే వైసీపీ నేరుగా పొత్తుకు వెళ్ళదు, కానీ తాము చేసే తప్పులను కప్పిపుచ్చుకోవడానికి బీజేపీ పేరును వాడుకుంటూ కార్యకర్తల్లో కృత్రిమ ధైర్యాన్ని నింపే ప్రయత్నం చేస్తోంది.
బీజేపీపై వైసీపీ వ్యూహాత్మక తప్పుడు ప్రచారం
బీజేపీ కూడా ఏపీలో టీడీపీ-జనసేన కూటమికి ప్రత్యామ్నాయంగా వైసీపీని బతికించాలనుకుంటోందనే వాదన కేవలం వైసీపీ సృష్టించుకున్న ఒక భ్రమ మాత్రమే కావచ్చు. జాతీయ స్థాయిలో తమకు అవసరమైనప్పుడు పార్లమెంటులో మద్దతు తీసుకున్నంత మాత్రాన, అవినీతి ఆరోపణలు ఎదుర్కొంటున్న పార్టీని బీజేపీ శాశ్వతంగా భుజాన వేసుకుంటుందని భావించడం పొరపాటే అవుతుంది. ముఖ్యంగా హిందూ ధర్మం, లడ్డూ అపవిత్రత వంటి సున్నితమైన అంశాలలో ప్రజల ఆగ్రహం తీవ్రంగా ఉన్నప్పుడు, వైసీపీని వెనకేసుకొస్తే అది బీజేపీకే నష్టదాయకం. మేము తప్పు చేసినా మమ్మల్ని ఎవరూ ఏమీ చేయలేరు అనే అహంకారం ప్రజాస్వామ్యంలో ఎక్కువ కాలం చెల్లదు. కేంద్ర సంస్థల రక్షణ ఉందనే నమ్మకంతో చేసే ప్రచారాలు పార్టీ కేడర్కు తాత్కాలిక ఊరటనివ్వవచ్చు కానీ, ప్రజల్లో మాత్రం ఆ పార్టీపై ఉన్న గౌరవాన్ని పూర్తిగా తుడిచిపెట్టేస్తాయి. చట్టం తన పని తాను చేసుకుపోతుందనే వాస్తవం గ్రహించకుండా, కేవలం రాజకీయ వ్యూహాలతోనే గట్టెక్కాలని చూడటం అటు పార్టీకి, ఇటు ఆ పార్టీ అగ్రనేతలకు భవిష్యత్తులో గడ్డు పరిస్థితులను సృష్టిస్తుంది.
