గీతా ఆర్ట్స్‌ కాంపౌండ్‌ గురించి, అల్లు అరవింద్‌ గురించి తరచూ ఓ విమర్శ వినిపింస్తుంటుంది… ఓ పట్టాన కథలు ఓకే చేయరని! ఇకవేళ ఓకే చేసినా… సినిమా చేసేంతవరకూ అడుగడుగునా దర్శకుణ్ణి చేయి పట్టుకు నడిపిస్తారని! అవన్నీ ఎంతవరకూ నిజమో తెలియదు కానీ… చిన్న కుమారుడు అల్లు శిరీష్‌ సినిమాల్లో ఆయన హస్తం తప్పకుండా వుంటుంది. సినిమా స్ర్కిప్ట్‌ దగ్గర్నుంచి థియేటర్లలోకి వచ్చే వరకూ డాడీ సలహాలు తీసుకుంటానని అల్లు శిరీష్‌ స్వయంగా చెప్పాడు. బుధవారం పుట్టినరోజు సందర్భంగా ఇచ్చిన ఇంటర్వ్యూలో అల్లు శిరీష్‌ మాట్లాడుతూ ‘‘నేను చేయబోయే సినిమా కథలను ముందుగా డాడీ, సెట్స్‌కు వెళ్లే ముందు బన్నీ వింటారు. ఇద్దరూ తమ తమ సలహాలు చెబుతారు. షూటింగ్‌ అయ్యాక, ఎడిటింగ్‌ ముందూ తర్వాత డాడీ సినిమా చూస్తారు’’ అని అన్నారు. ఎడిటింగ్‌కి ముందు తర్వాత అంటే… అల్లు అరవింద్‌ సలహాలతో సినిమాలకు కత్తెరలు పడతాయన్నమాట! అయితే… అల్లు శిరీష్‌ మాత్రం గీతా ఆర్ట్స్‌ సంస్థలో నిర్మించే సినిమా కథలను వినరట! ‘‘డాడీ, ‘బన్నీ’ వాసు మా బ్యానర్‌లో తీసే సినిమాల కథలు వింటారు. మా ఫ్యామిలీ హీరోలకు సూటయ్యే కథలు వస్తే మాకు చెబుతారు. లేదంటే బయట హీరోలతో సినిమాలు చేస్తారు. ఇప్పుడు విజయ్‌ దేవరకొండ హీరోగా ఒక సినిమా చేస్తున్నాం. అంతకు ముందు నాగచైతన్యతో ‘100% లవ్‌’, నానితో ‘భలే భలే మగాడివోయ్‌’ చేశాం కదా’’ అన్నారు. ‘కొత్త బంగారు లోకం’, ‘సీతమ్మ వాకిట్లో సిరిమల్లె చెట్టు’, ‘బ్రహ్మోత్సవం’ సినిమాల దర్శకుడు శ్రీకాంత్‌ అడ్డాల దర్శకత్వంలో సినిమా చేస్తున్నాడనే వార్తను ఖండించారు. ‘నేనూ ఈ వార్తను తొలిసారి వింటున్నా. గీతా ఆర్ట్స్‌ చాలామంది దర్శకులకు అడ్వాన్సులు ఇచ్చింది. అందులో శ్రీకాంత్‌ అడ్డాల ఒకరు. ఆయన చెప్పిన కథకు నేను సూటవుతానని డాడీ అనుకున్నారేమో’’ అన్నాడు శిరీష్‌.
చిన్నబ్బాయి సిన్మాలకు అల్లు అరవింద్‌ కత్తెరలు…?
