చారిత్ర‌క నేప‌థ్య‌మున్న సినిమాల్ని తెర‌కెక్కించ‌డం సామాన్య‌మైన విష‌యం కాదు. తెరపై మ‌న‌దైన వాతావ‌ర‌ణం క‌నిపించ‌దు. మ‌న‌దైన భాష వినిపించ‌దు. ఎప్పుడో జ‌రిగిపోయిన క‌థ‌ని `మ‌సాలా` జోడించి క‌ళ్ల‌కు క‌ట్టాలి. అది నిజ‌మ‌ని న‌మ్మించాలి. ఇదంతా క‌త్తిమీద సామే. పైగా పౌరాణిక, జాన‌ప‌ద చిత్రాల‌న్నీ లెంగ్తీ ప్రాజెక్ట్స్‌. సినిమా నిడివి కూడా ఎక్కువ‌గానే వ‌చ్చేస్తుంది. దాదాపు మూడు గంట‌ల వ‌ర‌కూ సాగిన సినిమాలున్నాయి. చెప్పాల్సిన కంటెంట్ ఎక్కువ‌గా ఉండ‌డ‌మే అందుకు కార‌ణం. ఈ రోజుల్లో మూడు గంట‌ల సినిమా అంటే ఎవ‌రు చూస్తారు..?? క్రిష్ ద‌ర్శ‌క‌త్వం వ‌హించిన గౌత‌మి పుత్ర శాత‌క‌ర్ణి నిడివి కూడా ఎక్కువ‌గానే ఉంటుంద‌నుకొన్నారంతా. కానీ… క్రిష్ అక్క‌డే తన మాయాజాలం చూపించాడు. ఈ సినిమా కేవ‌లం 2 గంట‌ల 12 నిమిషాలు మాత్ర‌మే. ఓ మామూలు క‌మ‌ర్షియ‌ల్ సినిమా నిడివి కంటే త‌క్కువే.
ఇంత కంటే జ‌నం ఎక్కువ చూడ‌లేరు` అని క్రిష్ ముందే ఫిక్స‌యి క్రిస్పీగా స్క్రిప్టు రాసుకొన్నాడు. స్క్రిప్టు ద‌శ‌లోనే అవ‌వ‌స‌ర స‌న్నివేశాల్ని త‌గ్గించుకొంటూ వ‌చ్చాడ‌ట. లెంగ్తీ సీన్లు, భారీ డైలాగులు ఇవేం లేకుండా, ప‌ద్యాల జోలికి పోకుండా, సంస్క్రృత స‌మాసాల్ని వ‌ల్లించ‌కుండా జాగ్ర‌త్త పడిన‌ట్టు టాక్‌. ఇంత స్పాన్ ఉన్న క‌థ‌నీ కేవ‌లం 79 రోజుల్లో షూటింగ్ పూర్తి చేశాడంటే ఎంత ప్లాన్డ్‌గా వెళ్లాడో అర్థం అవుతోంది. పైగా ఇలా అనుకొన్నారో లేదో.. అలా షూటింగ్‌కి వెళ్లిపోయాడు. సెట్లు వేయ‌డానికి, కాస్ట్యూమ్ డిజైన్ చేయ‌డానికి పెద్ద స‌మ‌యం తీసుకోలేదు. త‌నకు అందుబాటులో ఉన్న లొకేష‌న్ల‌ని వాడుకోవ‌డం వ‌ల్ల సెట్స్ వేసే ప‌ని, ఖ‌ర్చు, స‌మ‌యం ఇవ‌న్నీ త‌గ్గిపోయాయి. మేకింగ్ విష‌యంలో క్రిష్ తెలివి తేట‌ల‌న్నీ ఇప్పుడే క‌నిపించిపోతున్నాయి. ఇక.. జ‌నాన్ని ఎంత‌లా మెప్పిస్తాడా అనేది తెర‌పైనే తేలాలి.
