రిజర్వ్ బ్యాంక్ ఆఫ్ ఇండియా తన తాజా మానిటరీ పాలసీ సమీక్షలో రెపో రేటును 5.25% వద్ద స్థిరంగా కొనసాగించినప్పటికీ, వాణిజ్య బ్యాంకులు మాత్రం గృహ రుణాలపై వడ్డీ రేట్లను పెంచుతున్నాయి. అంతర్జాతీయంగా పెరుగుతున్న ద్రవ్యోల్బణ ఒత్తిళ్లు, ముఖ్యంగా ముడి చమురు ధరలు బ్యారెల్‌కు 100 డాలర్ల మార్కును దాటడం వంటి కారణాలతో బ్యాంకులు తమ నిధుల వ్యయాన్ని సర్దుబాటు చేసే పనిలో పడ్డాయి. కొన్ని ప్రముఖ బ్యాంకులు వడ్డీ రేట్లను 0.10 నుండి 0.25 శాతం వరకు పెంచుతూ నిర్ణయం తీసుకున్నాయి.

సాధారణంగా ఆర్‌బీఐ రెపో రేటును తగ్గించినప్పుడు మాత్రమే వడ్డీ రేట్లు తగ్గుతాయని ఆశించే సామాన్యుడికి, రెపో రేటు స్థిరంగా ఉన్నా బ్యాంకులు రేట్లు పెంచడం మింగుడుపడటం లేదు. దీనికి ప్రధాన కారణం బ్యాంకుల వద్ద లిక్విడిటీ తగ్గడం , డిపాజిట్లపై ఇస్తున్న వడ్డీ రేట్లు పెరగడమే. బ్యాంకులు తమ లాభదాయకతను కాపాడుకోవడానికి, పెరిగిన డిపాజిట్ వ్యయాన్ని రుణగ్రహీతలపైకి నెట్టడం వల్ల గృహ రుణాలు ఖరీదవుతున్నాయి.

ఈ నిర్ణయం వల్ల ముఖ్యంగా మిడ్-సెగ్మెంట్ ఇళ్ల కొనుగోలుదారులు తీవ్ర ప్రభావానికి గురయ్యే అవకాశం ఉంది. ఉదాహరణకు, రూ. 50 లక్షల రుణంపై 0.25% వడ్డీ పెరిగితే, నెలకు సుమారు 800 నుండి 1,000 వరకు ఈఎంఐ భారం పెరుగుతుంది. ఇది చిన్న మొత్తంగా అనిపించినా, 20 ఏళ్ల సుదీర్ఘ కాలపరిమితిలో లక్షలాది రూపాయల అదనపు భారాన్ని మోపుతుంది. ఇప్పటికే పెరిగిన నిర్మాణ వ్యయంతో ఇబ్బంది పడుతున్న ఈ వర్గానికి, తాజా వడ్డీ రేట్ల పెంపు గోరుచుట్టుపై రోకలిపోటు లా మారింది.

రియల్ ఎస్టేట్ రంగంపై కూడా దీని ప్రభావం స్పష్టంగా కనిపిస్తోంది. వడ్డీ రేట్లు పెరుగుతుండటంతో కొత్తగా ఇళ్లు కొనాలనుకునే వారు తమ నిర్ణయాలను వాయిదా వేసుకునే అవకాశం ఉంది. ముఖ్యంగా ఐటీ రంగం మరియు ఇతర ప్రైవేట్ రంగాల్లోని మధ్యతరగతి ఉద్యోగులు తమ బడ్జెట్‌ను మళ్లీ లెక్కలు వేసుకోవాల్సి వస్తోంది.