చైతూ.. మ‌రీ ఇంత రిస్కా??

చేతిలో ఓ హిట్టున్న ద‌ర్శ‌కుడితో ప‌నిచేయ‌డానికి హీరోలు నానా ర‌కాలుగా ఆలోచిస్తున్నారు. హిట్టు సినిమా తీయ‌గ‌ల‌డు.. అన్న న‌మ్మ‌కం ఉంటే త‌ప్ప బ‌రిలోకి దిగ‌డం లేదు. వ‌రుస హిట్లున్న హీరోలే ఇలా ఆలోచిస్తుంటే, కెరీర్‌లో ఎదుగూ బొదుగూ లేకుండా న‌త్త న‌డ‌క న‌డుస్తున్న నాగ‌చైత‌న్య ఇంకెంత ఆలోచించాలి? ఇంకెంత ప‌క‌డ్బందీగా ద‌ర్శ‌కుల‌ను ఎంచుకోవాలి? అయితే… మ‌రోసారి నాగ‌చైత‌న్య గుడ్డిగా అడుగులు వేస్తున్నాడు. ఓ ఫ్లాప్ ద‌ర్శ‌కుడితో సినిమా చేయ‌డానికి రెడీ అయిపోయాడు.

అత‌నెవ‌రో కాదు.. ర‌మేష్ వ‌ర్మ‌. ఒక ఊరిలో సినిమాతో ద‌ర్శ‌కుడిగా ప్ర‌యాణం మొద‌లెట్టాడు ర‌మేష్ వ‌ర్మ‌. ఆ సినిమా ఫ్లాప్ అయ్యింది. ర‌వితేజ‌తో తీసిన వీర కూడా అంతంత మాత్ర‌మే. మొన్నామ‌ధ్య నాగ‌శౌర్య‌కీ ఓ అట్ట‌ర్ ఫ్లాప్ ఇచ్చాడు. అలాంటి ర‌మేష్ వ‌ర్మ క‌థ‌కు నాగ‌చైత‌న్య బౌల్డ్ అయిపోయాడ‌ట‌. అన్న‌పూర్ణ కాంపౌండ్ హీరోల‌తో సినిమా చేయాల‌ని ఎప్ప‌టి నుంచో భారీ స్కెచ్చులు రెడీ చేసుకొంటున్నాడు ర‌మేష్ వ‌ర్మ‌. ఇప్పుడు ర‌మేష్ దాటికి నాగ‌చైత‌న్య ప‌డిపోయాడు. త్వ‌ర‌లోనే వీరిద్ద‌రి కాంబినేష‌న్లో ఓ సినిమా తెర‌కెక్క‌బోతోంద‌ని టాలీవుడ్ వ‌ర్గాల టాక్‌. తెలిసి తెలిసి చైతూ ఇంత రిస్క్ ఎందుకు చేస్తున్నాడో మ‌రి.