జ‌యం నుంచి చూస్తే… నితిన్ గెట‌ప్‌లో పెద్ద‌గా మార్పులేం క‌నిపించ‌లేదు. నూనూగు మీసాలతో ఎప్పుడూ చాక్లెట్ బోయ్‌లానే క‌నిపించేవాడు. అప్పుడ‌ప్పుడూ లైట్ గా కాస్త గెడ్డం పెంచేవాడంతే. ఇప్పుడు మాత్రం.. స‌రికొత్త లుక్‌తో వ‌చ్చేశాడు. నిండుగా గ‌డ్డం పెంచి కొత్త‌గా క‌నిపిస్తున్నాడు. అఆ త‌ర‌వాత హను రాఘవపూడి దర్శకత్వంలో తెర‌కెక్కించే ఓ చిత్రంలో న‌టిస్తున్నాడు నితిన్. ఈ సినిమా ఈరోజే లాంఛ‌నంగా ప్రారంభ‌మైంది. నితిన్‌ని చూస్తే గ‌డ్డం పెంచుకొన్న యువ రుషిలా ఉన్నాడు. ఆమ‌ధ్య పవన్ క‌ల్యాణ్ కూడా గ‌డ్డాన్ని ఇలానే పెంచుకొని… ఆ లుక్‌లో నెల‌ల త‌ర‌బడి క‌నిపించాడు. పవన్ వీరాభిమాని అయిన నితిన్ కూడా ఇప్పుడు అదే స్టైల్‌లోకి మారిపోయాడు. ఈ సినిమా కోస‌మే నితిన్ గ‌డ్డం పెంచాడ‌ట. ఈ సినిమా మొత్తం నితిన్ ఇలానే క‌నిపించ‌నున్నాడ‌ని టాక్‌. హను రాఘ‌వ పూడి ద‌ర్శ‌క‌త్వం వ‌హిస్తున్న ఈ చిత్రం.. ఓ ప్రేమ‌క‌థా నేప‌థ్యంలో సాగుతుంద‌ని తెలుస్తోంది. 14 రీల్స్ ఎంట‌ర్‌టైన్‌మెంట్స్ సంస్థ నిర్మిస్తున్న ఈ చిత్రంలో క‌థానాయిక ఎవ‌ర‌న్న‌ది తెలియాల్సివుంది.
దర్శకుడు హను రాఘవపూడి మాట్లాడుతూ – ”ఇదొక డిఫరెంట్‌ లవ్‌స్టోరీ. నితిన్‌తో ఫస్ట్‌టైమ్‌ వర్క్‌ చేయడం చాలా సంతోషంగా వుంది. అందర్నీ ఆకట్టుకునే చక్కని ఎంటర్‌టైనర్‌గా ఈ చిత్రం రూపొందనుంది. 14 రీల్స్ ఎంటర్‌టైన్‌మెంట్‌ బేనర్‌లో ‘కృష్ణగాడి వీరప్రేమగాథ’ తర్వాత చేస్తున్న ఈ సినిమా తప్పకుండా ప్రతి ఒక్కరినీ ఆకట్టుకుంటుంది” అన్నారు. పూర్తి వివ‌రాలు త్వ‌ర‌లో తెలుస్తాయి.
