ప్ర‌తీ హీరో వ‌స్తూ వ‌స్తూనే ఓ బిరుదు త‌గిలించుకొని వ‌చ్చేస్తున్నాడు. ఒక్క సినిమా కూడా చేయ‌కుండా సంపూర్ణేష్ బాబు బ‌ర్నింగ్ స్టార్ అనిపించుకోలేదూ… అలా! ఈ బిరుదుల ప‌ర్వంపై ఐఫాలో సెటైర్లు మీద సెటైర్లు వేసేశారు వ్యాఖ్యాత‌లు రానా, నాని. `మేం సెటైర్లు వేయ‌డానికే వ‌స్తున్నాం.. కాచుకోండి` అని ముందే హింటిచ్చిన ఈ హీరోలిద్ద‌రూ.. చెప్పిన మాట చెప్పిన‌ట్టు చెసేశారు. మ‌రీ ముఖ్యంగా యంగ్ హీరోల‌పై సెటైర్లు, పంచ్‌లు తెగ విసిరేశారు. `సుప్రీమ్` సినిమా చేశాడు కాబ‌ట్టి సాయిధ‌ర‌మ్ తేజ్‌ని `సుప్రీమ్ హీరో`అని పిల‌వాల్సివ‌స్తోంద‌ని… ఆ బిరుదు ఎవ్వ‌రూ ఇవ్వ‌లేద‌ని పంచ్‌లేశారు. పెళ్లి చూపులు హీరో విజ‌య్ దేవ‌ర‌కొండ‌నైతే ఓ ఆట ఆడుకొన్నారు. రెండో సినిమాకే క‌టౌట్లు త‌గిలించుకొని వ‌చ్చాడ‌ని.. క‌టౌట్ స్టార్ అన్నారు. ఆ త‌ర‌వాత రానా కొత్త బిరుదు సృష్టించాడు. `స‌ర్‌ప్రైజ్ స్టార్` అంటూ విజ‌య్‌కి బిరుదు అంకితం చేశాడు. `అవును… వీడు హీరో అవ్వ‌డం నాకు స‌ర్‌ప్రైజే` అంటూ నాని కౌంట‌రేశాడు. విజ‌య్ వేసుకొచ్చిన కోటు గురించి కూడా నాని ఎట‌కారంగానే మాట్లాడాడు.
అంతేకాదు… సుచీ లీక్స్‌పైనా కొన్ని జోకులు పేలాయి. `నాన్ బాహుబ‌లి రికార్డుల` ప్రస్తావన ఐఫా వేడుక‌ల‌పై తీసుకొచ్చారు వీరిద్ద‌రూ. నెంబర్ వ‌న్‌ని ఎలాగూ కొట్టలేని సినిమాలు `నాన్ బాహుబ‌లి రికార్డ్‌` అంటూ నెం.2తో సంతృప్తి ప‌డుతున్నాయ‌ని, దాన్నే నెం.1 అనుకొంటున్నాయ‌ని ఈమ‌ధ్య రికార్డులు సృష్టించిన సినిమాల‌కు చుర‌క‌లు అంటించారు. రానా, నాని ఇద్ద‌రూ కార్య‌క్ర‌మాన్ని కాస్త ఆహ్లాద‌క‌రంగానే న‌డిపించ‌డానికి ప్ర‌య‌త్నించారు. వీరిద్ద‌రి యాంక‌రింగ్ వ‌ల్లే… ఐఫాకి కాస్త జోష్ వ‌చ్చింది.
