రానాతో త‌రుణ్ భాస్క‌ర్‌

మాస్ట‌ర్ మైండ్ అంటే సురేష్ బాబుదే. ఓ ప్రాజెక్ట్ సెట్ చేశాడంటే.. అందులో మినిమం గ్యారెంటీ ఉంటుంది. పైసా రాబ‌డి లేనిదే ఒక్క స్టెప్పు కూడా వేయ‌డు. ఓ విధంగా వ్యాపార వేత్త‌కు ఉండే స‌గ‌టు క్వాలిటీ అదే. సురేష్ బాబు దృష్టిలో ఎవ‌రైనా ప‌డ్డారంటే… వాళ్ల కెరీర్ మొత్తం రామానాయుడు స్టూడియోకి అంకితం అయిపోవాల్సిందే. ప్ర‌స్తుతం ఆయ‌న ఫోక‌స్ త‌రుణ్ భాస్క‌ర్‌పై ప‌డింది. పెళ్లి చూపులు, ఈ న‌గ‌రానికి ఏమైంది? రెండూ సురేష్ ప్రొడ‌క్ష‌న్ నుంచి వ‌చ్చిన‌వే. ముచ్చ‌ట‌గా మూడో సినిమా కూడా ఈ సంస్థ‌లోనే చేయ‌బోతున్నాడు త‌రుణ్‌. ఈసారి.. రానాతో త‌రుణ్ జోడీ కుదిరింది. ఈ న‌గ‌రానికి ఏమైంది త‌ర‌వాత రానాతో త‌రుణ్ సినిమా ఉండొచ్చు. సురేష్ బాబు త‌న మ‌రో త‌న‌యుడు అభిరామ్‌తో ఓ సినిమా చేద్దామ‌ని అప్పుడెప్పుడో ఫిక్స్ అయ్యాడు. పెళ్లి చూపులు త‌ర‌వాత‌… త‌రుణ్ అభిరామ్‌తోనే సినిమా చేయాల్సింది. కానీ కుద‌ర్లేదు. రానాతో సినిమా లేట‌వుతుంద‌నుకుంటే.. త‌రుణ్ కోసం మ‌రో హీరోని రంగంలోకి దింప‌డానికి కూడా సురేష్ బాబు రెడీగానే ఉన్నాడ‌ట‌. అయితే త‌రుణ్ మాత్రం మూడో సినిమాకి ఇంకాస్త స‌మ‌యం కావాల‌ని, రానా వ‌చ్చే వ‌ర‌కూ ఎదురు చూస్తాన‌ని చెబుతున్నాడ‌ట‌. సో.. త‌రుణ్ మూడో సినిమా కూడా… ఇక సురేష్ బాబు చేతుల్లోకి వెళ్లిపోయిన‌ట్టే.