వైఎస్ వివేకానందరెడ్డి హత్య కేసులో అసలైన దోషులను బయటకు తీసుకురావాలన్న పట్టుదలతో ఆయన కుమార్తె డాక్టర్ సునీతా రెడ్డి తన న్యాయపోరాటాన్ని తీవ్రతరం చేశారు. సీబీఐ దర్యాప్తు తీరుపై తీవ్ర అసంతృప్తి వ్యక్తం చేస్తూ, ఆమె తాజాగా మరోసారి కోర్టు మెట్లు ఎక్కారు.
వివేకా హత్య కేసులో సీబీఐ దర్యాప్తు తూతూమంత్రంగా సాగిందని సునీతా రెడ్డి ఆరోపిస్తున్నారు. ఇటీవలే సీబీఐ ప్రత్యేక కోర్టులో సమర్పించిన మూడవ అనుబంధ చార్జ్ షీట్లో కొత్తగా ఎలాంటి ఆధారాలు లేవని, కొత్త నిందితులెవరూ లేరని సీబీఐ పేర్కొనడంపై ఆమె మండిపడ్డారు. ఈ దర్యాప్తు కేవలం కాల్ డేటా రికార్డుల విశ్లేషణకే పరిమితమైందని, అసలు సూత్రధారులను వదిలేస్తున్నారని ఆవేదన వ్యక్తం చేస్తూ, సమగ్ర విచారణ కోరుతూ ఆమె ఆంధ్రప్రదేశ్ హైకోర్టులో పిటిషన్ దాఖలు చేశారు.
గతంలో సుప్రీంకోర్టు ఆదేశాల మేరకు సీబీఐ కొన్ని అంశాలపై దర్యాప్తు చేపట్టినప్పటికీ, అది ఆశించిన స్థాయిలో లేదని సునీత వాదిస్తున్నారు. ముఖ్యంగా కీలక నిందితుల మధ్య జరిగిన ఫోన్ సంభాషణలు, అర్ధరాత్రి జరిగిన సందేశాల విషయంలో సీబీఐ ఇచ్చిన వివరణలను ఆమె తప్పుబడుతున్నారు. సమయం నమోదులో సాంకేతిక పొరపాట్లు జరిగాయని చెబుతూ సీబీఐ కేసును నీరుగార్చే ప్రయత్నం చేస్తోందని, బాహ్య శక్తుల ఒత్తిడి వల్లే దర్యాప్తు ఆగిపోయిందని ఆమె ప్రశ్నిస్తున్నారు.
వివేకా హత్య వెనుక ఉన్న అసలైన కుట్రను ఛేదించడంలో దర్యాప్తు సంస్థలు విఫలమవుతున్నాయని సునీత ఆరోపణ. కేవలం కొందరు నిందితుల వాంగ్మూలాలను నమోదు చేసి సరిపెట్టుకున్నారని, కానీ ఈ హత్య వెనుక ఉన్న రాజకీయ కోణాలను, అసలు కుట్రదారులను పక్కన పెట్టారని ఆమె వాదిస్తున్నారు. తన తండ్రి చనిపోయిన రోజు నుంచి నేటి వరకు తను అడుగుతున్న ప్రశ్నలకు సరైన సమాధానాలు దొరకలేదని, అందుకే పోరాటం ఆపే ప్రసక్తే లేదని స్పష్టం చేస్తున్నారు.
