సంగారెడ్డి నామినేషన్ కేంద్రం నుంచి దేశ్ పాండే అనే నేత నేరుగా కిషన్ రెడ్డికి ఫోన్ చేసి లిస్టులో తన పేరు పెట్టి.. బీఫాం వేరే వాళ్లకు ఇవ్వడం ఏమిటని.. కుటుంబంతో సహా ఆత్మహత్య చేసుకుంటానని ఏడుస్తూ చెప్పారు. ఆ వీడియోలు సోషల్ మీడియాలో వైరల్ అయ్యాయి. మరో వైపు వేమువలవాడలో తుల ఉమ అనే మహిళా నేతకూ అదే పరిస్థితి. అక్కడ ఆమెకు టిక్కెట్ ప్రకటించి.. తరవాత విద్యాసాగర్ రావు కుమారుడు వికాస్ రావుకు బీఫాం ఇచ్చారు. ఇవే కాదు.. లెక్కలేనన్ని చిత్రాలు… బీజేపీలో జరిగాయి.
కంటోన్మెంట్‌ లో చివరి క్షణంలో కాంగ్రెస్‌ అసంతృప్త నేత గణేశ్‌కు టికెట్‌ కట్టబెట్టింది. వనపర్తిలోనూ అభ్యర్థిని మార్చేసింది. సంగారెడ్డిలో పోటీచేయాలని బీజేపీ ఆఫర్‌ ఇచ్చినా నీలం మధు ఆసక్తి చూపలేదు. ఆయన బీఎస్పీవైపు మొగ్గుచూపారు. తెలంగాణలో పార్టీ అభ్యర్థుల ప్రకటన విషయంలో మొదటి నుంచీ గందరగోళ పడుతూనే ఉంది బీజేపీ. వేములవాడ సీటు విషయంలో బీజేపీ తర్జనభర్జనలు పడి మూడో లిస్టులో తుల ఉమకు కేటాయించింది. ఆమెకు టికెట్‌ ఇవ్వకపోతే తాను పార్టీని వీడుతానంటూ ఈటల రాజేందర్‌ ఒకానొక దశలో అధిష్టానంపై తీవ్ర ఒత్తిడి చేశారు. వేలాది మందితో ఆమె నామినేషన్ కూడా వేశారు. కానీ చివరి లిస్టులో వికాస్‌రావు పేరును ప్రకటించింది. చివరిక్షణంలో ఆయనకు బీ-ఫాం అందజేసింది.
బీజేపీ అధిష్టానం వనపర్తి సీటును ఆర్టీసీ జేఏసీ నేత అశ్వత్థామరెడ్డికి కేటాయించింది. ఆయన నామినేషన్ కూడా వేశారు. తీరా చివరి నిమిషయంలో అక్కడ బీ-ఫాం వేరే వారికి కేటాయించింది. బెల్లంపల్లి సీటును తొలుత శ్రీదేవికి ఇచ్చింది. తీరా నాలుగో లిస్టులో ఏమాజి పేరును ప్రకటించి అందర్నీ అయోమయానికి గురిచేసింది. మళ్లీ తమ అభ్యర్థి శ్రీదేవినే అని చెప్పి బీ-ఫాం అందజేసింది. అలంపూర్‌ స్థానంలో మరియమ్మకు సీటు కేటాయించారు. చివరకు ఆమె స్థానంలో రాజగోపాల్‌ను ఫైనల్‌ చేశారు. చాంద్రాయణగుట్ట అభ్యర్థి పోటీచేయబోనని ప్రకటించడంతో కొత్తగా కె.మహేందర్‌ను ప్రకటించింది.
బలమైన అభ్యర్థులు లేరనుకుంటే.. ఉన్న వారితోనే ఇలా సర్కస్ ఆడుకోవడంతో… బీజేపీ ఇంత గందరగోళంగా ఎందుకు మారిందని క్యాడర్ తలబాదుకుంటున్నారు.
