హైదరాబాద్‌లో ఏ దారిలో చూసినా విద్యుత్ సంస్థలపై వందల కొద్దీ వైర్లు కనిపిస్తూ ఉంటాయి. ఏదైనా ప్రమాదం జరిగితే తీవ్రత పెరగడానికి ఇవి కారణం అవుతున్నాయి. ఈ సమస్యను శాశ్వతంగా పరిష్కరించేందుకు తెలంగాణ ప్రభుత్వం చర్యలు ప్రారంభించింది.

తెలంగాణ ప్రభుత్వం హైదరాబాద్ మెట్రో జోన్‌లో ఓవర్‌హెడ్ విద్యుత్ కేబుల్స్‌ను అండర్ గ్రౌండ్ కేబులింగ్‌కు మార్చే మొదటి దశ ప్రణాళికకు రూ.4,051 కోట్ల ఆమోదం ఇచ్చింది. తెలంగాణ స్టేట్ సదర్న్ పవర్ డిస్ట్రిబ్యూషన్ కంపెనీ లిమిటెడ్ సమర్పించిన ప్రతిపాదన ప్రకారం, బంజారా హిల్స్, సికింద్రాబాద్, హైదరాబాద్ సెంట్రల్, హైదరాబాద్ సౌత్ సర్కిల్స్‌ను కవర్ చేస్తుంది. మొత్తం రూ.14,725 కోట్ల అండర్ గ్రౌండ్ కేబులింగ్ వ్యవస్థలో ఇది మొదటి దశ

గ్రేటర్ హైదరాబాద్ మున్సిపల్ కార్పొరేషన్ పరిధిలో మల్టీ-యుటిలిటీ కేబుల్ సిస్టమ్‌ను ఏర్పాటు చేయాలని ప్రభుత్వం నిర్ణయించింది. ఈ మొదటి దశలో మెట్రో జోన్‌లోని 3,899 కి.మీ. ఓవర్‌హెడ్ లైన్లను అండర్ గ్రౌండ్ కేబుల్స్‌కు మార్చనున్నారు. బెంగళూరు మోడల్‌ను అనుసరించి, టి-ఫైబర్, ఇతర టెలికాం కేబుల్స్‌తో పాటు విద్యుత్ లైన్లను ఒకే వ్యవస్థలో ఏర్పాటు చేయడానికి సహాయపడుతుంది.

నాలుగైదేళ్లలో హైదరాబాద్ మొత్తం విద్యుత్ సహా ఎలాంటి వైర్లు బయటకు కనిపించకుండా.. భూగర్భ కేబుల్ వ్యవస్థ ద్వారానే ఉండేలా చూడాలని నిర్ణయించారు. కేబుల్-ఫ్రీ హైదరాబాద్ ను ప్రజలకు అందించాలని నిర్ణయించారు.