రాజధాని విషయంలో ఆంధ్రప్రదేశ్ టీడీపీ అధ్యక్షుడు అచ్చెన్నాయుడు.. అధికార పార్టీని కార్నర్ చేసేందుకు ప్రయత్నిస్తున్నారు. గతంలో చంద్రబాబు ప్రజాభిప్రాయసేకరణ కోసం ఎన్నికలకు వెళ్లాలని సవాల్ చేశారు. అయితే.. వైసీపీ ఉత్తరాంధ్ర నేతలు.. భిన్నమైన ప్రచారం చేస్తున్నారు. రాజీనామాలు చేయాలని సవాళ్లు చేస్తున్నారు. ఈ క్రమంలో విశాఖ పార్లమెంట్ నియోజకవర్గం నుంచి ఎంపీ సహా అందరం రాజీనామా చేసి.. తేల్చుకుందామని అయ్యన్నపాత్రుడు సవాల్ చేశారు. దానికి వైసీపీ నేతలు సైలెంటయ్యారు. కొద్ది రోజుల కిందట.. మంత్రి అప్పలరాజు కూడా తన స్థానం నుంచి రాజీనామా చేస్తానని రాజధాని ఎజెండాగా తనపై పోటీచేయాలని టీడీపీ నేతలకు సవాల్ చేశారు.
తర్వాత టీడీపీ నేతలే రాజీనామా చేయాలని మాట మార్చారు. ఈ క్రమంలో అచ్చెన్నాయుడు.. ఉత్తరాంధ్ర విషయంలో కీలకమైన సవాల్‌ను వైసీపీ నేతల ముందు ఉంచారు. ఏపీ టీడీపీ అధ్యక్షుడుగా బాధ్యతలు చేపట్టనున్నసమయంలో… టీవీచానళ్లతో మాట్లాడుతున్న ఆయన రాజధాని విషయంలో చాలా స్పష్టమైన వైఖరితో ఉన్నారు. వైసీపీకి ధీటుగా సమాధానం చెబుతున్నారు. తనతో సహా ఉత్తరాంధ్ర ప్రజాప్రతినిధులందరం రాజీనామా చేద్దామని… రాజధాని ఎజెండాగా ఎన్నికలకు వెళ్ధామని.. ప్రజాభిప్రాయం ఏమిటో తెలిసిపోతుందని సవాల్ చేస్తున్నారు.
రాజధాని పేరుతో ఉత్తరాంధ్రలో పెద్ద ఎత్తున సెంటిమెంట్ ఏర్పడిందని వైసీపీ నేతలు భావిస్తున్నారు. కానీ టీడీపీ నేతలు మాత్రం… ప్రజల్ని భయపెట్టి నోరు తెరవకుండా చేస్తున్నారని.. వైసీపీ నేతలు చేస్తున్న దందాల కోసమే రాజధాని పేరుతో హడావుడి చేస్తున్నారని అంటున్నారు. వైసీపీ నేతలు.. తరచూ ఎన్నికల ప్రస్తావన తెస్తూండటంతో.. టీడీపీ దాన్ని మరింత విస్తృతం చేస్తోంది. రాజీనామాలకు భయపడుతోంది వైసీపీ నేతలేనన్న అభిప్రాయం కల్పించేందుకు ప్రయత్నిస్తోంది. ఈ విషయంలో అచ్చెన్న మరింత దూకుడుగా వ్యవహరిస్తున్నారు.
