వ్యక్తిగత స్వేచ్ఛకు సమాధి..! ఇది ఎమర్జెన్సీ కాక మరేమిటి..?

ప్రజాస్వామ్య దేశంలో.. పౌరులకు ఉండే ప్రాథమిక హక్కు.. వ్యక్తిగత స్వేచ్చ. దాన్ని వంద శాతం హరించేందుకు కేంద్రం నిర్ణయం తీసుకోవడం కలకలం రేపుతోంది. ఇప్పుడు… ప్రతి ఒక్కరి జీవితం… కంప్యూటర్లు, ఫోన్లతో అనుసంధానమైపోయిది. ఒక్క అడుగు ఎటు నుంచి ఎటు వైపు వేసినా ఫోన్‌లో నమోదయిపోతోంది. ఇక కంప్యూటర్‌లో జీవితానికి సంబంధించిన అన్ని అంశాలూ ఉండిపోతున్నాయి. వీటికి ఇప్పుడు రక్షణ లేదు. అధికారం ఉన్న వారి చేతుల్లోకి వెళ్లిపోయింది. ఎవరిపైనైనా కోపం వస్తే… అధికార కేంద్రాలు.. వారిని రోడ్డు మీద పడేయడానికి కావాల్సినట్లు..ఈ ఫోన్లు, కంప్యూటర్లలోని సమాచారాన్ని వాడుకోబోతోంది. ప్రజలందరికీ దడ పుట్టించే ఈ నిర్ణయాన్ని ఉలుకూ..పలుకూ లేకుండా కేంద్రం తీసుకుంది.

ఈ నిర్ణయం ప్రజల్లో తీవ్ర ఆందోళనకు కారణం అవుతోంది. మోదీ అభద్రతాభావంతో ఉన్న ఓ నియంతగా మారిపోయారని.. కాంగ్రెస్ పార్టీ అధ్యక్షుడు రాహుల్‌గాంధీ ఆరోపింంచారు. అందుకే ప్రజల వ్యక్తిగత జీవితాల్లోకి తొంగిచూడాలని చూస్తున్నారన్నారు. ప్రత్యర్థుల్ని ఏ రకంగానైనా కట్టడి చేయాలని భావిస్తున్నారని.. 10 విచారణ సంస్థలు ఎవరి కంప్యూటర్‌, మొబైల్‌ని అయినా…నియంత్రించగలవంటూ ఇచ్చిన ఆర్డినెన్స్‌తోనే తెలిసిపోతోందన్నారు. కేంద్రం నిర్ణయంపై టీడీపీ అధినేత చంద్రబాబు కూడా విస్మయం వ్యక్తం చేశారు.కంప్యూటర్లు, మొబైల్స్‌లోని డేటాను కేంద్ర నిఘా సంస్థలు…యాక్సిస్‌ చేయొచ్చు అని ఆదేశాలు ఇవ్వడం దారుణమన్నారు। ముందస్తు నోటీసులు లేకుండా ఆర్డినెన్స్‌తెచ్చారని ..మోదీ వ్యక్తిగత స్వేచ్ఛను హరిస్తున్నారని మండిపడ్డారు. మోదీ పాలనలో వ్యక్తిగత హక్కులకు కూడా…భరోసా లేకుండా పోయిందని మళ్లీ రుజువైందని ఆగ్రహం వ్యక్తం చేశారు. కేంద్రం ఆర్డినెన్స్‌ని ఉపసంహరించుకోవాలని డిమాండ్ చేశారు.

నిజానికి.. ఇలా అనుమానాస్పద వ్యక్తుల వ్యవహారాలను పరిశీలించడానికి ఇప్పటికీ.. దర్యాప్తు సంస్థలకు అవకాశం ఉంది. కానీ ఇక్కడ విశేషం ఏమిటంటే.. అనుమానాస్పద వ్యక్తులు ఎవరంటే.. దానికో విశ్లేషణ ఉంటుంది. కానీ… ఇప్పుడు ఇచ్చిన ఆదేశాల్లో ఎవరి కంప్యూటర్లను అయినా చూడొచ్చు. ఎవరి ఫోన్లలోకి అయినా చొరబడవచ్చు. అనుమానాస్పదులు కావాల్సినఅవసరం లేదు. మోడీకి కావాలంటే.. చంద్రబాబు కంప్యూటర్, ఫోన్లలోకి చొరబడి.. ఆయన వ్యక్తిగత సమాచారాన్ని మొత్తం విచారణ సంస్థలు క్షణాల్లో ఇచ్చేయగలవు. దీనిపై..అధికారంలో ఉన్నారు కాబట్టి బీజేపీ నేతలు చంకలు గుద్దుకుంటున్నారు. వారు బీజేపీలో ఉన్నారు కాబట్టి వారి కంప్యూటర్లను ఎవరూ పరిశీలించరని అనుకుంటున్నారు. కానీ అది తమ వరకే రాదనుకోవడం.. రాజకీయ ప్రత్యర్థుల వద్దకే వెళ్తుందనుకోవడం మూర్ఖత్వం. ఓ రకంగా దేశంలో ఇప్పుడు ఎమర్జెన్సీనే అమలవుతోంది. ఇది రాను రాను మరింత ప్రమాదకరంగా మారుతోంది.