కేంద్ర దర్యాప్తు సంస్థలు మెల్లగా ఏపీలోకీ వస్తున్నట్లుగా కనిపిస్తోంది. ఎప్పుడో ఏడాది కిందట గుడివాడ కేసినో కేసుపై కేంద్ర దర్యాప్తు సంస్థలకు టీడీపీ ఫిర్యాదు చేస్తే ఇప్పుడే గుర్తొచ్చినట్లుగా కేసు బయటకు తీశారు ఇన్‌కంట్యాక్స్ అధికారులు. మరిన్ని వివరాలు ఇవ్వాలని ఫిర్యాదు చేసిన టీడీపీ నేత వర్ల రామయ్యకు నోటీసులు జారీ చేశారు. 19వ తేదీన వర్ల రామయ్య ఐటీ అధికారులు అడిగిన సమాచారం ఇవ్వనున్నారు.
జనవరిలో సంక్రాంతి సందర్భంగా గుడివాడలో నాలుగు రోజుల పాటు కేసినో నిర్వహించారు. కొడాలి నానికి చెందిన కే కన్వెన్షన్ సెంటర్ లో క్యాసినో తో పాటు పేకాట లాంటి జూదాలతో పాటు చీర్ గర్ల్స్ తో అసభ్య నృత్యాలు నిర్వహించారు. ఈ వీడియోలు వైరల్ అయ్యాయి. టీడీపీ పెద్ద ఎత్తున ఆందోళన చేసింది. చంద్రబాబు తన పార్టీ సీనియర్ నేత వర్ల రామయ్య నేతృత్వంలో నిజనిర్ధారణ కమిటీ నియమించారు. ఆ కమిటీ అనేక ఆధారాలను సేకరించింది.
క్యాసినో ద్వారా రూ. 250 నుంచి 500 కోట్ల వరకు లావాదేవీలు జరిగాయని వర్ల రామయ్య ఆరోపిస్తున్నారు. మొత్తం 13 మంది చీర్ గర్ల్స్ ఇండిగో విమానంలో ప్రయాణం చేశారని వెల్లడించారు.గన్నవరం – బెంగళూరు. బెంగళూరు – గోవా, గోవా – విజయవాడ ప్రయాణీకుల వివరాలను మీడియా ముందు ఉంచారు. వీటిని దర్యాప్తు సంస్థలకు కూడా ఇచ్చారు. క్యాసినో పాల్గొనే వారి నుండి రూ.50వేల వరకూ వసూలు చేశారనీ, ఆ ప్యాకేజీలో భాగంగా లాడ్జి వసతి, ట్రాన్స్ పోర్టు, ఎంట్రీ ఫీజు అన్ని ఉచితమని వర్ల రామయ్య సాక్ష్యాలు చూపించారు. వీటిని ఢిల్లీకి వెళ్లి ఐటీ, ఈడీ, రెవిన్యూ ఇంటెలిజెన్స్ వంటి వాటికి ఫిర్యాదు చేశారు.
గుడివాడ కేసినో అంశం తీవ్ర దుమారం రేగడంతో గుడివాడ రూరల్‌ పోలీస్‌ స్టేషన్‌లో కేసు నమోదు చేశారు . అప్పటి ఎస్పీ సిద్ధార్థ్‌ కౌశల్‌ ప్రత్యేక విచారణ అధికారిగా నూజివీడు డీఎస్పీ శ్రీనివాసులును నియమించారు. .కానీ ఆ తర్వాత విచారణ ముందుకు సాగలేదు. ఇన్ని రోజులకు టీడీపీ నేతల ఫిర్యాదుపై ఐటీ స్పందించడం ఆసక్తికరంగా మారింది. గుడివాడలో కేసినో నిర్వహించింది.. కేసినో కింగ్ చీకోటి ప్రవీణ్. దీంతో ముందు ముందు ఏదో జరగబోతోందన్న వాదన వినిపిస్తోంది.
