కాంగ్రెస్ ప్రభుత్వం తన దయా దాక్షిణ్యాల మీదనే ఆధారపడి ఉందని అంటున్నారు కేసీఆర్. ఎందుకంటే ఇరవై మంది ఎమ్మెల్యేలను తీసుకుని వచ్చే ఓ సీనియర్ నేత .. కేసీఆర్ తో టచ్ లో ఉన్నారు. ఈ విషయాన్ని ఆయనే చెప్పారు. కాంగ్రెస్ లో పరిస్థితేం బాలేదు.. వచ్చేయమంటే ఇప్పుడే వచ్చేస్తానన్నారట. కేసీఆర్ కేసీఆర్ మాత్రం ఇప్పుడే వద్దు అని చెప్పానంటున్నారు. నలుగురు ఎమ్మెల్యేలు అటూ ఇటూ అయితే మైనార్టీలో పడిపోయే ప్రభుత్వాన్ని ఇరవై మంది ఎమ్మెల్యేలతో సహా వస్తానంటే కేసీఆర్ వద్దనడం అంటే మామూలు విషయం కాదు. బీఆర్ఎస్ విస్తృత స్థాయి సమావేశంలో కేసీఆర్ పార్టీ నేతలకు ఇలాంటి మాటలు చాలా చెప్పారు.
బీఆర్ఎస్ కు 111 మంది ఎమ్మెల్యేలు ఉన్నప్పుడే.. బీఆర్ఎస్ ఎమ్మెల్యేలను కొనేందుకు ప్రయత్నించారన్నారు. తాము దొరకబట్టుకున్నామని అందుకే మోదీ కక్ష కట్టారని కేసీఆర్ తెలిపారు. ఎమ్మెల్యేల కొనుగోలు కేసులో బీఎల్ సంతోష్ ను అరెస్టు చేసేందుకు పోలీసుల్ని పంపామని .. అందుకే అమిత్ షా, మోదీ కక్ష కట్టి.. కవితను అరెస్టు చేయించారన్నది కేసీఆర్ వాదన. లిక్కర్ కేసు ఉత్తదేనని చెప్పుకొచ్చారు.
బీఆర్ఎస్ ఇప్ప‌టి వ‌ర‌కు 8 లోక్‌స‌భ సీట్ల‌లో గెలుస్తామ‌ని సర్వేలు చెబుతున్నాయి. మ‌రో మూడు స్థానాల్లో విజ‌యావ‌కాశాలు ఉన్నాయని కేసీఆర్ స్ప‌ష్టం చేశారు. మెజార్టీ సర్వేలు.. ఒకటి, రెండు అని చెబుతున్నా.. పార్టీ నేతల్లో ధైర్యం నింపడానికి పెద్దగా ఊరూపేరూ లేని సర్వేలను బీఆర్ఎస్ మీడియా హైలెట్ చేసి.. అదే సర్వేలని నమ్మబలుకుతోంది. కేసీఆర్ కూడా అదే చెబుతున్నారు. పార్లమెంట్ ఎన్నికల తర్వాత ఈ మాటల్నీ ఏమవుతాయో కానీ.. కేసీఆర్ చెప్పిన విషయాలన్నింటినీ బీఆర్ఎస్ నేతలు సీరియస్ గా ఆలకించారు.
