కొడాలి నాని కొన్నాళ్లుగా నోరు తెరవలేదు. ఈ మధ్య కాలంలో ఆయనకు క్యాన్సర్ వచ్చిందన్న ప్రచారం జరిగింది. అయితే హఠాత్తుగా ఆయన తెరపైకి వచ్చారు. తాను పవన్ కల్యాణ్ ను కలిసేందుకు ప్రయత్నం చేశానని కానీ కుదరలేదన్న విషయాన్ని ప్రకటించారు. గుడివాడలో జరిగిన ప్రెస్ మీట్‌లో ఆయన అన్న ఈ మాటలు ప్రస్తుతం చర్చనీయాంశం అవుతున్నాయి.
కొడాలి నాని ఈ ప్రెస్ మీట్‌లో పవన్ కల్యాణ్‌తో పాటు చంద్రబాబు, లోకేష్ ను ఎప్పట్లాగే బూతులు తిట్టారు. అయితే పవన్ కల్యాణ్‌నుకలిసేందుకు చాలా ప్రయత్నం చేశానని కానీ కుదలేదని చెప్పడం ద్వారా అందరి ద్రాక్షన పుల్లన అనే నక్క తరహాలో ఇప్పుడు బూతులు అందుకుంటున్నారన్న వాదన వినిపిస్తోంది. పవన్ కల్యాణ్ ను కలిసేందుకు కొడాలి నాని చేసిన ప్రయత్నం… జగన్ రెడ్డికి తెలిసిందని అందుకే.. వివరణకు ఆయన ఈ ప్రెస్ మీట్ పెట్టారని అంటున్నారు.
చంద్రబాబు గెలవడని చెప్పేందుకు.. ఆయనకు మద్దతుగా ఉండకూడదని చెప్పేందుకు పవన్ ను కలిసేందుకు ప్రయత్నించానని చెప్పారు. కుదరకపోవడంతో మీడియా ద్వారా చెబుతున్నానని అంటున్నారు. అంటే.. తాను పవన్ ను కలిసేందుకు ఎందుకు ప్రయత్నించారో హైకమాండ్‌కు ఇలా వివరణ ఇచ్చారన్న అభిప్రాయం వినిపిస్తోంది. తన ప్రయత్నాలు ఫలించకపోవడం.. ఇటు జగన్ రెడ్డి కూడా నమ్మే పరిస్థితి పోతుందేమోనన్న భయంతో మళ్లీ బూతులు అందుకున్నారన్న వాదన వైసీపీలో వినిపిస్తోంది. మొత్తంగా కొడాలి గూడుపుఠాణీ ఏదో చేస్తున్నారని మాత్రం ఎక్కువ మంది నమ్ముతున్నారు.
