రాజన్న పాలన తీసుకొస్తానని జగన్మోహన్ రెడ్డి చెబుతూ ఉంటారు. తీసుకొచ్చేశారని వైసీపీ నేతలు అప్పుడప్పుడు సంబరాలు చేసుకుంటూ ఉంటారు. కానీ నిఖార్సైన ఫీడ్ బ్యాక్ మాత్రం అప్పుడప్పుడు.. ఆత్మీయులైన వారి దగ్గర్నుంచే బయటకు వస్తూ ఉంటుంది. అలాంటి ఫీడ్ బ్యాక్.. కొండా సురేఖ వద్ద నుంచి ఏపీ ప్రభుత్వానికి అందింది. అదేమిటంటే.. వైఎస్ రాజశేఖర్ రెడ్డి పాలనకు.. జగన్మోహన్ రెడ్డి పాలనకు.. భూమికి.. ఆకాశానికి ఉన్నంత తేడా ఉందని. ఓ సారి గెలిచిన తర్వాత వైఎస్ఆర్ ఆందర్నీ సమానంగా చూస్తారని.. కానీ జగన్ మాత్రం.. కక్షలు తీర్చుకోవడానికి అధికారాన్ని ఉపయోగిస్తున్నారనేది కొండా సురేఖ విశ్లేషణ. అందరూ ఇదే అంటున్నారు కానీ.. కొండా సురేఖ చెప్పడం మాత్రం ప్రత్యేకం. ఎందుకంటే జగన్మోహన్ రెడ్డికి ఒకప్పుడు వీర విధేయులు కొండా దంపతులు.
తెలంగాణ ఉద్యమం తీవ్ర స్థాయిలో ఉన్నప్పుడు కూడా కొండా దంపతులు జగన్మోహన్ రెడ్డిని విడిచి పెట్టలేదు. ఆ ఊపులో ఓడిపోతామని తెలిసి కూడా జగన్మోహన్ రెడ్డి కోసం రాజీనామా చేసి పరకాల ఉపఎన్నికలకు వెళ్లారు. ఆ ఎన్నికల్లో తీవ్రంగా పోరాడారు. చాలా స్వల్ప తేడాతో ఓడిపోయారు. అయినా ఆ తర్వాత జగన్ ను వదిలి పెట్టలేదు. కానీ ఆ తర్వాత జగన్ పట్టించుకోకపోవడంతో తమ దారి తాము చూసుకున్నారు. అప్పట్నుంచి వైఎస్ తో పోల్చి.. జగన్‌కు అసలు పోలికలే లేవని చెబుతూ వస్తున్నారు. ప్రస్తుతం పాలన విషయంలోనూ..,వైఎస్‌తో అసలు జగన్‌కే పోలికే లేదని… చెబుతున్నారు. కేసీఆర్ డబ్బులతోనే జగన్ గెలిచారని కొండా సురేఖ అంటున్నారు. వెయ్యి కోట్లు పంపించారనేది ప్రచారమే కానీ.. ఎంత పంపారనేది కాదు.. ఖచ్చితంగా పంపించారని మాత్రం ఆమె అంటున్నారు.
వైఎస్ రాజశేఖర్ రెడ్డి మాత్రమే కాదు.. ఎవరు అధికారంలోకి వచ్చినా కక్ష సాధింపుల కోసం అధికారాన్ని వాడుకునే ప్రయత్నం చేయరు. చేసినా అది చాలా పరిమితంగా ఉండేది. కానీ ప్రస్తుతం ఏపీ ప్రభుత్వం ఎకైక అజెండా అధికారం అందింది కాబట్టి ప్రత్యర్థుల్ని టార్గెట్ చేయడం అన్నట్లుగా మారిపోయింది. ఓటు బ్యాంక్‌ను సంతృప్తి పరచడానికి ప్రజలకు పథకాల రూపంలో ఎంతో కొంత నగదు బదిలీ చేయడం.. ఆ తర్వాత ఇష్టం లేని వారిపై దండయాత్ర చేయడం.. కామన్‌గా మారిపోయింది. ఈ క్రమంలో చట్టాలను ఉల్లంఘిస్తున్నారని కోర్టుల్లో మొట్టికాయలు పడుతున్నా… వెనక్కి తగ్గని పరిస్థితులు ఉన్నాయి. వైఎస్ హయాంలో ఎన్నికల వరకే రాజకీయాలు.. మిగతా రోజుల్లో అందర్నీ సమానంగానే చూసేవారని కొండు సురేఖ లాంటి వాళ్లు చెబుతూ ఉంటారు.
