ఇది తెలంగాణ ఐటీ శాఖ మంత్రి కల్వకుంట్ల తారక రామారావు కొత్తగా పాడుతున్న పద్యం. ఆయన ముఖ్యమంత్రి పీఠం అధిరోహించాలంటే బావ, సహచర మంత్రి తన్నీర్ హరీష్ రావు అడ్డంకిగా ఉన్నారని చాలా కాలంగా పార్టీలో వినిపిస్తోంది. ఈ విషయాన్ని కేటీఆర్ సన్నిహితులు కూడా ఆయన చెవిలో వేసినట్లు చెబుతున్నారు. కుమార రత్నానికి సీఎం పీఠం కట్టబెడితే మేనల్లుడు హరీష్ రావు నుంచి వ్యతిరేకత వస్తుందనే అనుమానం ముఖ్యమంత్రి కే.చంద్రశేఖర రావును వెంటాడుతోంది అంటున్నారు. ఈ కారణంగానే కేటీఆర్ కు ముఖ్యమంత్రి పీఠం దూరం అవుతోందని పార్టీ వర్గాలు చెబుతున్నాయి. దీనిని ద్రష్టిలో ఉంచుకునే కుమారుడికి మెల్లిమెల్లిగా ఒక్కో బాధ్యతలు అప్పగిస్తున్నారని, దీని ద్వారా పార్టీలో పట్టు సాధిస్తారన్నది సీఎం కేసీఆర్ ఆలోచనగా చెబుతున్నారు. కేటీఆర్ ను సీఎం చేస్తే హరీష్ రావు తన వర్గం వారితో తిరుగుబాగు చేసే అవకాశం ఉందా అని కూడా ఆలోచనలో పడ్డారని సమాచారం. మరోవైపు అవకాశం కోసం ఎదురుచూస్తున్న భారతీయ జనతా పార్టీ తెలంగాణ రాష్ట్ర్ర సమితిలో ఎలాంటి ఇబ్బంది వచ్చినా దాన్ని తన వైపు తిప్పుకోవాలని భావిస్తోంది. పార్టీలో ఏదైనా తిరుగుబాటు వంటిది వస్తే శాసనసభ్యుల బలం లేకపోయినా కేంద్రం నుంచి మద్దతు తెలపాలన్నది బీజేపీ అధిష్టానం ఎత్తుగడగా ఉందంటున్నారు. ఈ పరిస్థితుల నేపథ్యంలో బావ, సహచర మంత్రి అయిన తన్నీర్ హరీష్ రావును తన వైపు తిప్పుకుని ఆయన నుంచే ప్రతిపాదన వచ్చేలా చేయాలన్నది కేటీఆర్ ఆలోచనగా చెబుతున్నారు. అందుకే ఇటీవల చాలాసార్లు మంత్రి హరీష్ రావుతో మాట కలపడం, ఆయన దూతలను హరీష్ వద్దకు పంపడం వంటివి చేస్తున్నారంటున్నారు. మరోవైపు హరీష్ రావు కూడా తన పని తాను చేసుకుంటున్నారే తప్ప పార్టీ వ్యవహారాల్లో పెద్దగా జోక్యం చేసుకోవడం లేదని పార్టీ వర్గాలు చెబుతున్నాయి. ముందుగా బావ హరీష్ రావు మద్దతు లభిస్తే ఇక మిగిలిన పనిని తండ్రి పూర్తి చేస్తారని కే.తారక రామారావు నమ్మకంగా ఉన్నట్లు చెబుతున్నారు.
బావా… ఎప్పుడు మద్దతిచ్చెదవీవు..!!
