‘పోరు నష్టం.. పొందు లాభం..’ అని సామెత! ఇది సార్వజనీనమైన సిద్ధాంతం. ప్రతి రంగానికీ వర్తించేదే. అయితే ఇప్పుడు తెలంగాణ రాజకీయాలకు సంబంధించి.. తెలుగుదేశం, భాజపా పార్టీలకు ప్రత్యేకంగా స్వానుభవంలోకి వచ్చిన సిద్ధాంతం ఇది అని మనం చెప్పుకోవాలి. ఈ రెండు పార్టీలు తెలంగాణలో కూడా మిత్రపక్షాలుగానే ఉన్నాయి. అసలే అధికార తెరాస విపరీతమైన బలంతో, మరింత బలాన్ని సంతరించుకుంటూ.. చెలరేగిపోతూ ఉంటే.. ప్రత్యర్థులు అయిన ఇలాంటి మిత్రపక్షాలు మరింతగా దగ్గరై కలసి పోరాడాల్సిన అవసరం ఉంటుంది. అయితే ఈ రెండు పార్టీల మధ్య ఉన్న కీచులాటలు వారిని దెబ్బ కొడుతూ వచ్చాయి. గ్రేటర్‌ హైదరాబాద్ పరిధిలో వారి మైత్రి ఫలితం చూపలేకపోయింది. దాంతో తెదేపా ఇక మునిగిన పడవ అని డిసైడైపోయి.. అక్కడికి తమకేదో మహా బలం ఉన్నట్లుగా అతిగా ఊహించుకుంటూ.. భాజపా ఎన్నికల క్షేత్రంలో ఒంటరిగా దిగడానికిసాహసించింది. మూడు మునిసిపల్‌ ఎన్నికల ఫలితాల్లో వారి తల కూడా దారుణంగా బొప్పి కట్టింది.
వరంగల్‌, ఖమ్మం, అచ్చంపేట ఎన్నికల ఫలితాలు వస్తే.. ఈ రెండు పార్టీలకు ఒక్కటంటే ఒక్క వార్డు కూడా దక్కలేదంటే.. అది వారి పతనానికి పరాకాష్ట. స్థానిక నాయకత్వం కోరిక మేరకు అనే ముసుగు వేసుకుని, తమ మధ్య మైత్రీ బంధాన్ని తెగ్గొట్టుకుని, తెలుగుదేశం- భాజపాలు విడివిడిగా దాదాపు అన్ని డివిజన్లకు పోటీచేశాయి. అంతో ఇంతో కాంగ్రెసుకైనా కొన్ని సీట్లు దక్కాయి గానీ.. ఈ రెండు పార్టీలకు ఒక్క సీటు కూడా దక్కలేదు.
పిట్టపోరు పిట్ట పోరు పిల్లి తీర్చిందన్నట్లుగా.. ఈ రెండు పార్టీలు విభేదాల బారిన పడి.. కొట్టుకోవడం.. అంతిమంగా తెరాసకే లాభించింది. వారికి ప్రతిచోటా తిరుగులేని మెజారిటీలు లభించాయి. తమలో తాము కొట్టుకుంటే అది తమకే ఎక్కువ నష్టం కలిగిస్తుందనే నీతిని ఈ రెండు పార్టీల నాయకులు ఇప్పటికైనా తెలుసుకుంటే వారికి మనుగడ ఉంటుంది. లేకపోతే.. ప్రస్తుతం ఉన్న వాతావరణాన్ని బట్టి ఈ రెండు పార్టీలు కూడా తెలంగాణలో దుకాన్‌ బంద్‌ అయ్యే ప్రమాదం ఉంది.
