జగన్మోహన్ రెడ్డి అక్రమాస్తులపై విచారణ పదేళ్లుగా ఒక్క అడుగు కూడా ముందుకు పడలేదు. దర్యాప్తు సంస్థ చార్జిషీట్లను ఆధారాలను సమర్పించింది. కానీ ఇప్పటి వరకూ నిందితులతా వ్యూహాత్మకంగా ఒకరి తర్వాత ఒకరు క్వాష్ పిటిషన్లు.. ఇతర పిటిషన్లు దాఖలు చేస్తూ.. బెయిల్ పై బయటకు వచ్చి వాళ్ల పని వాళ్లు చేసుకుంటున్నారు. జగన్ రెడ్డి బయటకు వచ్చి మళ్లీ సీఎం అయి కోర్టుకు కూడా వెళ్లడం మానుకున్నారు. ఇప్పుడు కూడా అక్రమాస్తుల కేసు విచారణ సాగుతుందో లేదో ఎవరికీ తెలియదు.
పదేళ్ల కిందట ప్రధానమంత్రి అభ్యర్థిగా ప్రజల్లోకి వచ్చిన నరేంద్రమోదీ ప్రజా ప్రతినిధులపై ఉన్న కేసుల విచారణ ఏడాదిలో పూర్తి చేస్తామని హామీ ఇచ్చారు. కానీ ఆయన కాలంలో జగన్ రెడ్డిని ఎంత ఆప్యాయంగా చూస్తున్నారో కానీ… అసలు కేసులు ముందడుగే పడలేదు. పైగా ఈడీ కేసులు, సీబీఐ కేసులు వేర్వేరుగా అయితే.. ముందు ఈడీ కేసుల విచారణ జరగకూడదని ఉత్తర్వులు కూడా తెచ్చుకున్నారు. సీబీఐ కేసులు అవినీతి కేసులు..ఈడీ కేసులు మనీలాండరింగ్ కేసులు.. వేర్వేరు నేరాలయితే.. భిన్నమైన ఉత్తర్వులు తెచ్చుకున్నారు. ఈ ఉత్తర్వులపై సుప్రీంకోర్టులో ఈడీ పిటిషన్ దాఖలు చేసింది. విచారణలో ఉంది.
ఇలా వరుసగా పిటిషన్ల పేరుతో టైం పాస్ చేస్తూనే ఉన్నారు కానీ విచారణకు రావడం లేదు. అత్యంత ఘోరమైన క్రిమినల్ మనస్థత్వంతో ఆర్థికఉగ్రవాదంలాగా కోర్టులు అభిప్రాయపడిన నేరాలు చేసిన జగన్ రెడ్డి .. బెయిల్ వల్ల బయటకు వచ్చి సీఎం అయి.. అన్ని వ్యవస్థలను దిగజార్చేస్తున్నారు. చివరికి ఓ సుప్రీంకోర్టు న్యాయమూర్తి మీద అత్యంత దారుణమైన ఆరోపణలు చేసి.. నేరుగా సుప్రీంకోర్టుకే లేఖ రాసి..దాన్ని మీడియాకు విడుదల చేశారు. న్యాయవ్యవస్థను బ్లాక్ మెయిల్ చేశారన్న ఆరోపణలు కూడా ఎదుర్కొన్నారు. ఆయన ఇప్పుడు ప్రతిపక్ష నేతలందర్నీ జైల్లో పెట్టి ఎన్నికలక వెళ్తానని సవాల్ చేస్తున్నారు.
వీఐపీల కేసులకు ఓ చట్టం.. సామాన్యులకు మరో చట్టం అన్నట్లుగా వ్యవస్థలు పని చేస్తూండటంతో.. సామాన్యుడికి వ్యవస్థలపై నమ్మకం పోతోంది. తప్పు చేసిన వాళ్లకు శిక్షపడకపోగా వారే.. తర్వాత తప్పు చేయని వాళ్లని వేధించే అవకాశాలు వస్తూండటంతో ఇక ఎవరికైనా.. నమ్మకం ఎలా ఉంటుంది. దేశంలో సామాన్యులతో పాటుపెద్దలకు కూడా చట్టాలు సమానంగా వర్తిస్తాయని.. అధికారంలో ఉన్న వారు.. పేదల్ని.. ప్రతిపక్ష నేతల్ని వేధించడానికి కాదని.. నిరూపణ అయిన రోజునప్రజలకు వ్యవస్థల్లో మరింత నమ్మకం కుదురుతుంది.
