నైజీరియన్ ముఠాలు కోట్లాది రూపాయల నిధి ఉంది, దాన్ని విడిపించడానికి కొంత డబ్బు కట్టండి అంటూ చేసే ఆన్లైన్ మోసాల గురించి వినేవాళ్లం. కానీ ఇప్పుడు అదే తరహాలో అనంతపురం జిల్లాలో ఒక రాజకీయ నాయకుడు ఏకంగా 7 లక్షల కోట్ల రూపాయలు బ్యాంకులో ఉన్నాయని నమ్మించి కోట్లు వసూలు చేయడం స్థానికంగా సంచలనం సృష్టించింది.
వైఎస్సార్ కాంగ్రెస్ పార్టీకి చెందిన అనంతపురం నాయకుడు ఎర్రిస్వామిపై ఈ భారీ ఆర్థిక మోసం కేసు నమోదైంది. మాజీ మంత్రి అనుచరుడినని, పెద్ద రాజకీయ పలుకుబడి ఉందని చెప్పుకునే ఎర్రిస్వామి, తన బ్యాంకు ఖాతాలో 7 లక్షల కోట్ల రూపాయల నిధులు ఉన్నాయని, అయితే కొన్ని సాంకేతిక కారణాల వల్ల ఆ నిధులు హోల్డ్ లో ఉన్నాయని బాధితులను నమ్మించాడు. ఆ భారీ మొత్తాన్ని విడిపించుకోవడానికి అత్యవసరంగా డబ్బు కావాలని, పని పూర్తయ్యాక భారీగా కమిషన్లు ఇస్తానని ఆశ చూపాడు. ఈ క్రమంలో పలువురి నుంచి కోట్ల రూపాయలను అప్పుగా తీసుకుని, తిరిగి చెల్లించకుండా ముఖం చాటేయడంతో అసలు రంగు బయటపడింది.
ఈ వ్యవహారంలో బాధితులు పోలీసులను ఆశ్రయించడంతో విస్తుపోయే నిజాలు వెలుగులోకి వచ్చాయి. నిందితుడు ఎర్రిస్వామి కేవలం మాటలతోనే కాకుండా, నకిలీ బ్యాంకు పత్రాలు, బాండ్ పేపర్లను సృష్టించి బాధితులను బురిడీ కొట్టించినట్లు తెలుస్తోంది. నైజీరియన్ గ్యాంగ్ తరహాలోనే అత్యంత పథకం ప్రకారం అమాయకులను, ఆశపోతు వ్యక్తులను లక్ష్యంగా చేసుకుని ఈ మాయాజాలం ప్రదర్శించాడు.
ప్రస్తుతం అనంతపురం పోలీసులు ఎర్రిస్వామిపై కేసు నమోదు చేసి విచారణ జరుపుతున్నారు. కేవలం అనంతపురం జిల్లాలోనే కాకుండా రాష్ట్రవ్యాప్తంగా ఇంకెంత మందిని ఇలా నమ్మించి మోసం చేశాడనే కోణంలో దర్యాప్తు సాగుతోంది.
