ఓ సోషల్ మీడియా పోస్టు షేర్ చేసినందుకు ఢిల్లీ నుంచి వచ్చి పోలీసులు నోటీసులు ఇవ్వడాన్ని సీఎం రేవంత్ రెడ్డి.. తెలంగాణపై దాడిగా పేర్కొన్నారు. బీజేపీ విధానాలను ప్రశ్నించినందుకు తెలంగాణ ముఖ్యమంత్రికి, గాంధీ భవన్ నేతలకు ఢిల్లీ పోలీసులు నోటీసులు ఇస్తున్నారని విమర్శించారు. ఎన్నికలు వచ్చినప్పుడల్లా మోదీ ప్రభుత్వం ఈడీ, సీబీఐ, ఐటీ అధికారులను ఉసిగొల్పి ప్రత్యర్థి పార్టీల నేతలను వేధిస్తున్నారని విమర్శించారు. కర్ణాటకలో కాంగ్రెస్ తరపున మల్లిఖార్జున ఖర్గే కోసం ప్రచారం చేసేందుకు వెళ్లారు. అక్కడే స్పందించారు.
గతంలో కేసీఆర్ అండ్ ఫ్యామిలీ తమకు ఎలాంటి నోటీసులు..కేసులు వచ్చిన తెలంగాణపై దాడిగా చెప్పేవారు. లిక్కర్ కేసులో నోటీసులు వచ్చినప్పుడు కవిత తెలంగాణ తల వంచదు అని గంభీరమైన ప్రకటనలు చేశారు. కవిత ఢిల్లీలో లిక్కర్ స్కాం చేస్తే ఇక్కడ తెలంగాణ తల వంచడం ఏమిటి అన్న సెటైర్లు చాలా మంది వేశారు. అయితే ఇప్పుడు రేవంత్ రెడ్డి తన వ్యక్తిగత కేసులో కాకుండా.. ఓ సోషల్ మీడియా పోస్టు విషయంలో నోటీసులు ఇవ్వడంతో..దాన్ని సెంటిమెంట్ గా మార్చుకునేందుకు ప్రయత్నిస్తున్నారు.
బీఆర్ఎస్ కు ఈ నోటీసులు పెద్ద అస్త్రంలాగా కనిపిస్తున్నాయి. ఫేక్ వీడియో కేసులో అసోంలో ఓ యువకుడ్ని అరెస్టు చేశారని.. తెలంగాణ సీఎంను అరెస్టు చేయకపోతే.. బీజేపీ, కాంగ్రెస్ మధ్య బంధం ఉన్నట్లేనని ఆయన తేల్చారు. బీఆర్ఎస్ నేతల ఆత్రుత చూసి కాంగ్రెస్ నేతలు ఆశ్చర్యపోతున్నారు. ఇలాంటి సోషల్ మీడియా కేసులు ఎ మాత్రం నిలబడవని అందరికీ తెలుసు. ఎవరు క్రియేట్ చేశారో వారిపై కేసులు పెట్టగలరు కానీ.. షేర్ చేసిన వాళ్లపై నిందను మోపలేరు. అయినా రాజకీయంగా పనికి వస్తుందని వాళ్లు నోటీసులు ఇస్తారు.. వాళ్లు రాజకీయం చేసుకుంటారు.
