స్థానిక ఎన్నికల విషయంలో స్టేట్ ఎలక్షన్ కమిషన్‌దే తుది నిర్ణయం అని ఏపీ హైకోర్టు తేల్చేసింది. ఎన్నికలు నిర్వహించకుండా నిలిపివేయాలంటూ ప్రభుత్వం దాఖలు చేసిన పిటిషన్‌పై విచారణ జరిపిన హైకోర్టు రూలింగ్ ఇచ్చింది. కరోనా కారణంగా ఎన్నికల వాయిదా విషయంపై.. ఎన్నికల కమిషన్‌కే లేఖ రాయాలని ప్రభుత్వానికి హైకోర్టు సూచించింది. ప్రభుత్వ విజ్ఞప్తిని ఎన్నికల కమిషన్ పరిశీలిస్తుందని తెలిపింది. కరోనా వ్యాక్సిన్, స్థానిక ఎన్నికలు రెండూ ప్రజలకు సంబంధించినవేనని.. దీనిపై రెండు పక్షాలు కూర్చోని మాట్లాడుకుంటే బాగుంటుందని హైకోర్టు అభిప్రాయం వ్యక్తం చేసింది.
అలా కాకపోతే ముగ్గురు అధికారులను ఎస్ఈసీ వద్దకు పంపాలని.. కమిషన్‌తో అధికారుల భేటీపై ఎస్ఈసీ ఒక వేదికను ఏర్పాటు చేయాలని సూచించింది. ప్రభుత్వ అధికారులు వారి వాదనను కమిషన్ ముందు వినిపించాలని తెలిపింది. ఈ చర్చల అనంతరం ఎస్ఈసీ ఒక నిర్ణయం తీసుకోవాలని ఆదేశించింది. ఇప్పటికే స్థానిక ఎన్నికలు నిర్వహించాలని ఆదేశాలు ఇచ్చామని గుర్తు ధర్మాసనం గుర్తు చేసింది. హైకోర్టు తాజా ఆదేశాలతో ఎన్నికల నిర్వహణ పూర్తిగా ఎస్ఈసీ నిమ్మగడ్డ రమేష్ కుమార్ చేతుల్లోనే ఉంది. హైకోర్టు చెప్పినట్లుగా ప్రభుత్వ వాదన వినడానికి ఆయన సిద్ధంగా ఉండాలి. అది విన్న తర్వాత ఎస్ఈసీ నిర్ణయం తీసుకోవాలి.
ఒక వేళ ఎన్నికలు నిర్వహించాల్సిందేనని ఆయన అనుకుంటే.. మాత్రం… అడ్డు చెప్పడానికి ప్రభుత్వానికి చాన్స్ ఉండదు. సహకరిస్తారా లేదా.. అన్నదానిపై తర్వాత పరిణామాలు ఆధారపడి ఉంటాయి. పలు రాష్ట్రాల్లో ఎన్నికల నిర్వహణపై ఎస్ఈసీ ఇచ్చిన ఆదేశాల్లో జోక్యం చేసుకోవడానికి సుప్రీంకోర్టు కూడా నిరాకరిచింది. ఇప్పటికే ఎన్నికల నిర్వహణకు ప్రభుత్వం.. అధికారులు సహకరించడం లేదని.. దిక్కరణ చర్యలు తీసుకోవాలని ఎస్ఈసీ నిమ్మగడ్డ హైకోర్టులో పిటిషన్ దాఖలు చేశారు.
