తెలంగాణ అసెంబ్లీ ఎన్నిక‌ల సంద‌ర్భంగా ఏర్ప‌డిన ప్ర‌జా కూటమి…. రాబోయే లోక్ స‌భ ఎన్నిక‌ల్లో కూడా కొన‌సాగుతుందా అనే చ‌ర్చ గ‌త కొద్దిరోజులుగా జ‌రుగుతున్న సంగ‌తి తెలిసిందే. అయితే, అసెంబ్లీ ఎన్నిక‌ల్లో కూటమి వైఫ‌ల్యాల‌పై ఇప్ప‌టికీ స‌రైన చ‌ర్చ జ‌ర‌గ‌లేదు. ఓట‌మి కార‌ణాల‌పై కాంగ్రెస్ పార్టీ కొన్ని నివేదిక‌లు త‌యారు చేసి, హైక‌మాండ్ కి కూడా పంపించింది. అయితే, టీడీపీతో పొత్తు కూట‌మికి కొంత ఇబ్బంది క‌లిగింద‌నేది కొంత‌మంది కాంగ్రెస్ నేత‌ల అభిప్రాయంగా ఉన్నా… ఇత‌ర కార‌ణాలే ఎక్కువ ప్ర‌భావితం చేసేశాయ‌నే ఉద్దేశంతో పీసీసీ అధ్య‌క్షుడు ఉన్న‌ట్టుగా తెలుస్తోంది. కాబ‌ట్టి, లోక్ స‌భ ఎన్నిక‌ల్లో కూడా ఇదే కూట‌మిని కొన‌సాగించినా త‌ప్పులేదు అనే అభిప్రాయం పీసీసీ వ‌ర్గాల్లో ఉన్న‌ట్టుగా చ‌ర్చ జ‌రుగుతోంది.
ప్ర‌జా కూటమి ఓట‌మిపై తాజాగా కోదండ‌రామ్ స్పందిస్తూ… అభ్య‌ర్థుల ఎంపిక త్వ‌ర‌గా చేయ‌క‌పోవ‌డం, ప్ర‌చారానికి స‌రైన స‌మ‌యం లేకపోవ‌డం, ప్ర‌చార వ్యూహాన్ని ప‌క్కాగా త‌యారు చేసుకోక‌పోవ‌డం లాంటివే కార‌ణాల‌న్నారు. అంతేకాదు, లోక్ స‌భ ఎన్నిక‌ల గురించి ఆయ‌న మాట్లాడుతూ… ఆ ఎన్నిక‌ల్లో కూడా ప్ర‌జా కూటమి కొన‌సాగుతుంద‌న్న‌ట్టుగానే ఆయ‌న మాట్లాడారు. తెరాసపై ప్ర‌జ‌ల్లో వ్య‌తిరేక‌త ఉన్న మాట వాస్త‌వ‌మే అయిన‌ప్ప‌టికీ, దాన్ని స‌ద్వినియోగం చేసుకోవ‌డంలోనే కూటమి ఫెయిల్ అయింద‌నేది ఆయ‌న విశ్లేషణ. అసెంబ్లీ ఎన్నిక‌ల్లో జ‌రిగిన పొర‌పాట్ల‌ను పునరావృతం కాకుండా చూసుకోవాల‌నేది ఆయ‌న సూచ‌న. ఇక, టీడీపీ నుంచి కూడా ప్ర‌జా కూటమి నుంచి బ‌య‌ట‌కి వ‌చ్చేయాల‌నే ఆలోచ‌న ఉన్న‌ట్టుగా కూడా సంకేతాల్లేవు. కాంగ్రెస్ తో పొత్తు కొన‌సాగింపు ధోర‌ణిలోనే టీడీపీ అధినేత చంద్ర‌బాబు ఉన్నారు. జాతీయ స్థాయిలో భాజ‌పాయేత‌ర ప‌క్షాల‌ను ఏకం చేయ‌డ‌మే ల‌క్ష్యంగా ఆయ‌న పెట్టుకున్నారు.
ఇక, కాంగ్రెస్ వైపు నుంచి చూసుకున్నా… ప్ర‌జా కూటమి కొన‌సాగింపున‌కే వారూ సిద్ధ‌మ‌నే ప‌రిస్థితి క‌నిపిస్తోంది. భాజ‌పాకి వ్య‌తిరేకంగా దేశంలో ఏ పార్టీ త‌మ వెంట వ‌చ్చినా క‌లుపుకుని లోక్ స‌భ ఎన్నిక‌లను ఎదుర్కోవాల‌ని కాంగ్రెస్ అధ్య‌క్షుడు రాహుల్ గాంధీ సిద్ధంగా ఉన్నారు. ఇప్ప‌టికే మ‌హారాష్ట్రలో ఎన్సీపీతో సీట్ల స‌ర్దుబాటు కూడా జ‌రిగిపోయింది. ఈ నేప‌థ్యంలో తెలంగాణ‌లో ఇప్ప‌టికే ఏర్ప‌డి ఉన్న కూట‌మిని కాద‌నుకునే విధంగా కాంగ్రెస్ వ్య‌వ‌హ‌రించే అవ‌కాశం లేదు. అసెంబ్లీ ఎన్నిక‌ల్లో తెరాస‌ను నేరుగా ఎదుర్కొన్నారు, లోక్ స‌భ‌లో భాజ‌పాకి వ్య‌తిరేకంగా కాంగ్రెస్ పోరాటం ఉంటుందనే ఆలోచ‌న‌తో పార్టీ సంసిద్ధ‌మ‌య్యే అవ‌కాశాలు క‌నిపిస్తున్నాయి. కాంగ్రెస్ తోపాటు, కూటమి భాగ‌స్వామ్య ప‌క్షాలైన తెలంగాణ జ‌న స‌మితి, టీడీపీలు కూడా క‌లిసే కొన‌సాగే ఆలోచ‌న‌లో ఉన్న‌ట్టుగా ప్ర‌స్తుత ప‌రిస్థితి క‌నిపిస్తోంది.
