రంగస్థలం హిట్ తో మరీ భారీగా లాభాలేమీ చేసుకోలేదు మైత్రీ మూవీస్. ఎందుకంటే సినిమాను కాస్త రీజనబుల్ రేట్లకే ముందుగా అమ్మేయడం వల్ల బయ్యర్లు ఎక్కువగా లాభపడ్డారు. అయితే ఒకటి రెండు ఏరియాలు చేతిలో వుండడం, కొద్దిగా ఓవర్ ఫ్లోస్ రావడం వల్ల మైత్రీ కూడా హ్యాపీనే.
అయితే నగదుకన్నా మైత్రీ ఎక్కువ లాభపడింది సుకుమార్ తో మరో సినిమా చేసే అవకాశం వుండడం, ఆ అవకాశాన్ని వాడుకుని మహేష్ తో సినిమాకు వైల్డ్ కార్డ్ ఎంట్రీ లభించడం. కానీ అంతలోనే ఆ ఆనందం ఆవిరయిపోయే ప్రమాదం ఏర్పడింది. సుకుమార్ తన వ్యవహారాలు వేరే వైపు మళ్లించి, అసిస్టెంట్లతో ప్రాజెక్టులు సెట్ చేసుకోవడం మొదలుపెట్టారు.
దాంతో మహేష్ సినిమాకు స్క్రిప్ట్ రెడీకాలేదు. సుకుమార్ చేస్తానన్న పీరియాడిక్ లైన్ మహేష్ వద్దన్నారు. ఇలాంటి టైమ్ లో దర్శకుడు అనిల్ రావిపూడికి వైల్డ్ కార్డ్ ఎంట్రీ లభించేసింది. దాదాపు ఈ ప్రాజెక్టు ఖాయం అయిపోయింది. అయితే మైత్రీని కలవరపెడుతున్నది ఇది కాదు.
సుకుమార్-మహేష్ ప్రాజెక్టును ఆ తరువాత అయినా పట్టాలు ఎక్కించగలమా? లేదా? అన్నది. ఎందుకంటే సీన్ లోకి అనిల్ రావిపూడి వస్తాడని ఎవ్వరూ ఊహించలేదు. ఒక్క బ్లాక్ బస్టర్ తో వచ్చేసాడు. ఆ సినిమా అయ్యేలోగా మహేష్ ఆలోచన ఎలా మారుతుందో? అన్నదే మైత్రీ కొత్త టెన్షన్ గా వుందని తెలుస్తోంది. మరోపక్కన నిర్మాత అల్లు అరవింద్-పరుశురామ్ కాంబినేషన్ లో సినిమా చేయమని మహష్ ను అడుగుతున్నట్లు వార్తలు వున్నాయి.
మరోపక్కన రాజమౌళి-కెఎల్ నారాయణ సినిమా ఎప్పటి నుంచో పెండింగ్ లో వుంది. వచ్చే మే నాటికి రాజమౌళి ఫ్రీ అయిపోతారు. అలాగే కొరటాల శివ కూడా జనవరి వేళకు దాదాపు ఫ్రీ అవుతారు. సైరా దర్శకుడు సురేందర్ రెడ్డి కాంబినేషన్ లో మహేష్ సినిమా కూడా ఎప్పటి నుంచో వార్తల్లో వుంది. ఆయన కూడా ఈ ఏడాది చివరకు అవైలబుల్ గా వుంటారు. ఇలా చాలా మంది మహేష్ కు ఆప్షన్ గా కనిపిస్తారు.
ఇలాంటి టైమ్ లో సుకుమార్ సరైన లైన్, రెడీ మేడ్ స్క్రిప్ట్ తో కనుక లేకపోతే, మైత్రీ మూవీస్ ఆశలు గల్లంతు అవుతాయి. అదే ఇప్పుడు మైత్రీ మూవీస్ టెన్షన్ గా వున్నట్లు తెలుస్తోంది. అందుకే మహేష్ బాబు గుడ్ బుక్స్ లో ఎలాగైనా వుండాలని కిందా మీదా అవుతున్నట్లు టాక్ వినిపిస్తోంది.
