నందమూరి హీరోలు.. ఆ ఎన్టీఆర్ నుంచి, ఈ ఎన్టీఆర్ వరకూ. ఎవరిని తీసుకొన్నా.. అందరూ నటనలో ఆరితేరిపోయినవాళ్లే. డైలాగులు చెప్పడంలో వాళ్ల తరవాతే ఎవరైనా! సాధారణమైన సన్నివేశాన్ని కూడా తమదైన ప్రతిభతో క్లాసిక్గా మర్చేసిన ఘట్టాలెన్నో చూశాం. మరీ ముఖ్యంగా కోర్టు సీన్లుల్లో నందమూరి వారి ప్రతిభ కనిపిస్తుంటుంది. కోర్టు కోర్టుకీ తీర్పు తీర్పుకీ ఇంత మార్పా?? అంటూ బొబ్బులి పులిలో ఎన్టీఆర్ కోర్టు సీనులో విజృంభించారు. అది.. ఓ క్లాసిక్గా నిలిచింది. కోర్టు సీన్ అంటే.. ముందుగా గుర్తొచ్చేది అది. ఇప్పటికీ ఆ డైలాగుల్ని నందమూరి అభిమానులు నెమరు వేసుకొంటూనే ఉన్నారు. మొన్నటికి మొన్న టెంపర్లో జూనియర్ కూడా అలాంటి కోర్టు సీనులోనే రెచ్చిపోయాడు.
అంతకు ముందు రాఖీలో అయితే ఎన్టీఆర్… అదరగొట్టేశాడు. ఎన్టీఆర్లోని నటుడు పూర్తి స్థాయిలో బయటకు వచ్చిన సినిమా అది. టెంపర్ కూడా అంతే కదా?? ఇప్పుడు కల్యాణ్ రామ్ కూడా కోర్టు సీనుల్లో తన ప్రతాపం చూపించాడట. ఇజం సినిమాలో కల్యాణ్ రామ్ కోసం ఓ కోర్టు సీను తెరకెక్కించాడు పూరి. అందులో కల్యాణ్ రామ్.. అద్భుతంగా నటించాడట. `కోర్టు సీన్లన్నీ నందమూరి వారి ఎకౌంట్లోకే` అంటూ ఇజం ఆడియో వేడుకలో స్టేట్మెంట్ ఇచ్చేశాడు పూరి. ఈసీన్ ఎన్టీఆర్ చూశాడని, తనకు విపరీతంగా నచ్చేసిందని చెప్పుకొచ్చాడు. టెంపర్ విజయంలో కోర్టు సీనుది కీలకమైన పాత్ర. అప్పటి వరకూ సినిమా ఒక ఎత్తు. ఆ తరవాత మరో ఎత్తు. సేమ్ అదే సెంటిమెంట్ ఇజంకీ రిపీట్ అయితే… కల్యాణ్ రామ్ ఖాతాలో హిట్టు పడిపోయినట్టే.