కొన్ని సినిమాల జాత‌క ప్ర‌భావ‌మో ఏమో.. ఎన్నాళ్ల‌కైనా బయటకు రావు! సినిమా పూర్త‌యి విడుద‌ల తేదీలు మార‌డం త‌ప్ప దోషం పోదు.. గ్ర‌హ‌ణం వీడ‌దు. అలా ఎన్నోసార్లు వాయిదా ప‌డుతూ వ‌చ్చిన ఏమిటో ఈమాయ చిత్రం రాజాధిరాజాగా విడుద‌లైంది. ఇప్పుడు అలాంటి పురాత‌న చిత్ర‌మే మ‌రోటి బయటకు వ‌స్తోంది. అదే శంక‌ర. నారా రోహిత్ క‌థానాయ‌కుడిగా న‌టించిన చిత్ర‌మిది. రెజీనా క‌థానాయిక. త‌మిళ చిత్రం మాన్ క‌రాటే చిత్రానికి ఇది రీమేక్‌. స‌త్య ద‌ర్శ‌క‌త్వం వ‌హించారు. సినిమా పూర్త‌యి రెండేళ్లు దాటేసింది. అయినా మోక్షం దొర‌క‌లేదు. నాలుగైదు సార్లు విడుద‌ల ముంగిట వ‌ర‌కూ వచ్చింది. కానీ… అనివార్య కార‌ణాల వ‌ల్ల వాయిదా ప‌డ‌డం అల‌వాటుగా మార్చుకొంది.
ఇప్పుడు మ‌రోసారి శంక‌ర సినిమాని బయటకు తీయ‌నున్నారు. ఈ సినిమాని ఈ సీజ‌న్‌లో ఎలాగైనా రిలీజ్ చేయాల‌ని నిర్మాత కె.ఎస్‌.రామారావు కంక‌ణం క‌ట్టుకొన్నార్ట. ట్రైల‌ర్‌ని కొత్త‌గా క‌ట్ చేసి, ప్ర‌మోష‌న్ భారీగా చేసి ఈ సినిమాని బయటకు పంపేయాల‌ని చూస్తున్నారు. ఈ సినిమా విడుద‌లైతే. క‌నీసం శాటిలైట్ రూపంలో అయినా నాలుగు డబ్బులు వెన‌కేసుకోవ‌చ్చ‌న్న‌ది నిర్మాత ఉద్దేశం. మ‌రి ఇప్ప‌టికైనా ఆ శంక‌రుడి ఈ శంక‌ర పై ద‌య చూపిస్తాడో, లేదో.??
