నాగ‌శౌర్య న‌టించిన ఓ సినిమా ఈరోజే ప్రేక్ష‌కుల ముందుకొచ్చింది. అదే… నీ జ‌త లేక! ఈ సినిమా గురించి ఎలాంటి ప్రచార ఆర్భాటాలూ జ‌ర‌గ‌లేదు. చ‌డీచ‌ప్పుడు లేకుండా వచ్చిన ఈసినిమా దానికి త‌గ్గట్టుగానే చ‌ప్పగానే ఉంది. నాగ‌శౌర్య ఈసినిమా ఎప్పుడు చేశాడో?? అంటూ జ‌నం ఆశ్చర్యపోతున్నారు. అయితే ఇది ఇప్పటి సినిమా కాదు. నాలుగేళ్ల క్రిత‌మే మొద‌లై.. మ‌ధ్యలో ఆగిపోయి, నానా పాట్లూ ప‌డి చివ‌రికి పూర్తయ్యింది. చివ‌రి క్షణాల్లో డ‌బ్బుల్లేక ప‌బ్లిసిటీ కూడా చేసుకోలేక, న‌టీన‌టులు సాంకేతిక నిపుణులు హ్యాండివ్వడంతో క‌నీస ప్రచారానికి కూడా నోచుకోలేక, చివ‌రికి ఏదో ర‌కంగా క‌ష్టప‌డి బ‌య‌ట‌కు వ‌చ్చింది. ఈ సినిమాని చూసిన కొద్ది మంది కూడా ‘ఇదేం సినిమారా బాబూ’ అంటూ శిరోభారంతో ధియేట‌ర్ల నుంచి బ‌య‌ట‌కు వ‌స్తున్నారు.
నిజానికి ఈ సినిమా ఆల‌స్యమ‌వ్వడం వ‌ల్ల ద‌ర్శక నిర్మాత‌ల‌కు న‌ష్టం జ‌రిగిందేమో గానీ, నాగ‌శౌర్యకు మాత్రం లాభ‌మే జరిగింది. ఎందుకంటే ఊహ‌లు గుస‌గుస‌లాడే, చంద‌మామ క‌థ‌లు కంటే ముందే రావ‌ల్సిన సినిమా ఇది. బ‌హుశా ఇదే త‌న తొలి సినిమాగా విడుద‌లై ఉంటే.. నాగ‌శౌర్యకు ఇన్ని మంచి అవకాశాలు వ‌చ్చేవి కావు. ఎందుకంటే ఈ సినిమాలో శౌర్య న‌ట‌న, అత‌ని పాత్ర అంత పూర్‌గా ఉన్నాయి. ఈ సినిమా చూసే నాగ‌శౌర్యని జ‌డ్జ్ చేయాల్సివ‌స్తే త‌ప్పకుండా తేలిపోయేవాడు. అందుకే ఈ సినిమా ఆలస్యం అవుతున్న కొద్దీ.. నాగ‌శౌర్య సంతోషించాడేమో అనిపిస్తోంది. ఎలాంటి ప్రచార ఆర్భాటాలూ లేకుండా గ‌ప్ చుప్‌గా రావ‌డం కూడా శౌర్యకు ప్లస్ పాయింటే. ఎందుకంటే ప‌బ్లిసిటీ బిల్డప్పుల‌తో హోరెత్తిస్తే.. ఈ సినిమా గురించి జ‌నానికి తెలిసేది. ఈ ఫ్లాప్ గురించి నాలుగురోజులు ఎక్కువ‌గా మాట్లాడుకొనేవాళ్లు. ఆలస్యం అమృతం విషం అంటారు. ఈ సినిమా ఆలస్యం మాత్రం అమృతం పోసింది. ఈ ఫ్లాప్ త‌న ఖాతాలో ఎక్కకుండా సాయం చేసింది. క‌లిసొచ్చే రోజులొస్తే ఇలానే ఉంటుంది మ‌రి.
