హోదాపై అవే మాటలు.. ! ఏపీ సీఎంను అవమానిస్తున్న కేంద్రం..!?

ఆంధ్రప్రదేశ్ ముఖ్యమంత్రి వైఎస్ జగన్మోహన్ రెడ్డిని కేంద్రం అవమానిస్తోంది. ప్రత్యేకహోదా విషయంలో.. ఆయన చేసిన విజ్ఞప్తులపై ఎలాంటి సమాధానం ఇవ్వకుండా.., పార్లమెంట్‌లో మాత్రం.. ప్రత్యేకహోదా ఇచ్చేది లేదని.. సభ్యులు అడిగిన ప్రశ్నలకు సమాధానాలు ఇస్తోంది. ముఖ్యమంత్రిగా బాధ్యతలు చేపట్టిన తర్వాత.. మూడు సార్లు అధికారికంగా రికార్డెడ్‌గా.. ముఖ్యమంత్రి ప్రత్యేకహోదా ప్రస్తావన తీసుకు వచ్చారు. అవి కూడా అత్యున్నత స్థాయి సమావేశాలే .. అయినప్పటికీ పార్లమెంట్‌లో మాత్రం… ప్రత్యేకహోదా ఇచ్చే అవకాశమే లేదని… ఆర్థిక మంత్రి నిర్మలా సీతారామన్‌తో ప్రకటింప చేశారు.

మూడు అత్యున్నత మీటింగ్‌లలో హోదా ప్రస్తావన తెచ్చిన జగన్..!

వైఎస్ జగన్మోహన్ రెడ్డి… ప్రత్యేకహోదా సాధన లక్ష్యంగా… ఎన్నికలలో గెలిచిన తర్వాత.. మూడు సార్లు.. అత్యున్నత సమావేశాల్లో హోదా ప్రస్తావన తీసుకు వచ్చారు. గెలిచిన తర్వాత ప్రమాణస్వీకారం చేయకముందే ఢిల్లీ వెళ్లిన జగన్మోహన్ రెడ్డి… ముఖ్యమంత్రికి ఇచ్చిన వినతిపత్రంలో హోదా అంశం గురించి చర్చించారు. ఆ తర్వాత నీతిఆయోగ్ మీటింంగ్‌లోనూ.. అదే ప్రస్తావన తెచ్చారు. దాదాపు తన ప్రసంగంలో అరవై శాతం.. ప్రత్యేకహోదాకే కేటాయించారు. ఆ తర్వాత.. అన్ని పార్టీలతో.. మోడీ, షా జరిపిన అఖిలపక్ష మీటింగ్‌లోనూ హోదా ప్రస్తావన తెచ్చారు. కానీ.. ఇంత వరకూ… వాటికి… కేంద్రం నుంచి సమాధానం రాలేదు. కానీ… ఆర్థిక మంత్రి మాత్రం… హోదా అంశం ముగిసిన అధ్యాయమంటూ..పార్లమెంట్‌లో ప్రకటించి ఏపీ సీఎంకు తాము పెద్దగా విలువ ఇవ్వడం లేదన్నట్లుగా వ్యవహరించారు.

ఏపీ అసెంబ్లీ తీర్మానం సంగతేమిటి..?

ఢిల్లీలో జరిగిన మీటింగ్‌లలోనే కాదు… ఆంధ్రప్రదేశ్ తొలి అసెంబ్లీ సమావేశాల్లోనూ జగన్మోహన్ రెడ్డి… తీర్మానం చేశారు. ఆంధ్రప్రదేశ్‌కు ప్రత్యేకహోదా శ్వాస అని తేల్చి.. ఆ మేరకు.. తీర్మానం చేసి.. కేంద్రానికి పంపారు. ఈ తీర్మానానికి అన్ని పార్టీలు ఏకగ్రీవంగా మద్దతు తెలిపాయి. ఈ అసెంబ్లీ తీర్మానాన్ని కూడా కేంద్రం.. పట్టించుకునే పరిస్థితి లేకుండా పోయింది. గత ప్రభుత్వం లో చేసినట్లుగానే.. ఈ ప్రభుత్వంతోనూ… బీజేపీ వ్యవహరిస్తోందన్న అభిప్రాయం వ్యక్తమవుతోంది.

ఇప్పటికీ “ప్లీజ్.. ప్లీజ్ ” అని అడుగుతూ ఉంటే ఏపీకి గౌరవం ఉంటుందా..?

వైఎస్ జగన్మోహన్ రెడ్డి… మోడీని మొట్టమొదటి సారి కలిసినప్పుడు.. ఇచ్చే వరకూ అడుగుతూనే ఉంటానని ప్రకటించుకున్నారు. ప్రస్తుతం ఉన్న పరిస్థితుల్లో ” ప్లీజ్.. ప్లీజ్..” అని అడగడం తప్ప.. ఇంకేమీ చేయలేమని… అప్పుడే చేతులెత్తేశారు. అలా పలుమార్లు అడిగినా.. నెల రోజుల్లోనే.. ప్రత్యేకహోదా అనేది ముగిసిన అధ్యాయమని… కేంద్రం పదేపదే మంత్రులతో చెప్పించింది. ఆ తర్వాత పార్లమెంట్‌లోనూ చెప్పించింది. ఇంత జరిగిన తర్వాత కూడా.. జగన్మోహన్ రెడ్డి.. ఏపీ సీఎం హోదాలో… “ప్లీజ్.. ప్లీజ్ ” అని అడుగుతూనే ఉంటానని చెబితే.. అది కచ్చితంగా ఏపీని అగౌరవపర్చడమే అవుతుంది. పోరాడితే.. కాస్తంత గౌరవం అయినా ఉంటుంది. మరి ఏపీ సీఎం ఏ బాటలో వెళ్తారో..?

Telugu360 is always open for the best and bright journalists. If you are interested in full-time or freelance, email us at Krishna@telugu360.com