ఏప్రిల్ 11న పోలింగ్ ముగిసిన తర్వాతి రోజు నుంచి ఏపీలో బెట్టింగులు ఊపందుకున్నాయి. వైఎస్ఆర్ కాంగ్రెస్ పార్టీ గెలుస్తుందంటూ పెద్ద ఎత్తున పందేలు జరిగాయి. వేల కోట్ల రూపాయల విలువైన ఆస్తులు కూడా.. మధ్యవర్తుల వద్దకు చేరాయి. అయితే.. మెల్లగా.. రోజులు గడిచే కొద్దీ… పరిస్థితి మారుతోంది. వైసీపీ తరపున బెట్టింగులు కాసిన వాళ్లంతా చల్లబడిపోయారు. ఇప్పుడు తాజాగా, రివర్స్ బెట్టింగ్ ప్రారంభమైంది. ఇందులో తెలుగుదేశం పార్టీకి 90 నుంచి 95 సీట్లు వస్తాయని, చంద్రబాబు మళ్లీ సియం అవుతారని, గతంలో వైసిపి తరుపున పందేలు కాసినవారే తిరిగి పందేలు కాస్తున్నారు. దీనికి కారణం.. తమ అంచనాలకు భిన్నంగా ఎటువంటి పరిణామం జరిగినా..చేతిలో డబ్బులు పోకుండా బ్యాలెన్స్ అవుతామని రివర్స్ బెట్టింగ్ లు ప్రారంభించారు. వారం రోజుల నుంచి బెట్టింగ్ ల వ్యవహారం తగ్గిపోయింది.
క్షేత్రస్థాయిలో వాస్తవాలు తెలియడం, నిజాలు నిదానంగా బయటికి రావడం, మహిళలు అర్దరాత్రి వరకు పోలింగ్ బూత్ ల వద్ద వేచిచూడటం, పెన్షనర్ల ఓటు టిడిపి వైపు మొగ్గిందని, ఎగ్జిట్ పోల్స్, పోస్ట్ పోల్ సర్వేలు బయటపెట్టడం, గ్రామాలలో సైతం ఈ సారి పోలింగ్ సరళి మారిందని వచ్చిన వార్తలతో అందరికీ నిజాలు నిదానంగా తెలిశాయి. దీంతో బెట్టింగ్ లు పెట్టిన వారంతా చేతిలో డబ్బులు వదులుకోకుండా రివర్స్ బెట్టింగ్ ను ప్రారంభించారు. ఒక్క సీటుతోనైనా టిడిపి ప్రభుత్వాన్ని ఏర్పాటు చేస్తుందని కొంతమంది, జనసేన మద్దతుతో తెలుగుదేశం ప్రభుత్వం ఏర్పడుతుందని మరికొంతమంది బెట్టింగ్ లు ప్రారంభించారు. వీరంతా గతంలో వైసిపి తరుపున బెట్టింగ్ లు వేసిన వారేనని పలువురు చెబుతున్నారు. విజయవాడ కేంద్రంగా ఈ బెట్టింగ్ లు ఎక్కువగా జరుగుతున్నాయి.
వైసిపి నేతలు గతంలో తమ పార్టీ గెలుస్తుందని బెట్టింగ్ లు వేశారని, ఇప్పుడు తెలుగుదేవం పార్టీ గెలుస్తుందని ఆ పార్టీకి చెందిన నేతలే తెలుసుకుని బెట్టింగ్ లు కాసిన వారందరినీ రివర్స్ బెట్టింగ్ లు వేయాలని కోరారని టీడీపీ నేతలు అంటున్నారు. రాష్ట్రంలో ఈ రివర్స్ బెట్టింగ్ ల గోల ఇప్పుడు తీవ్ర సంచలనం రేకెత్తిస్తుంది. ముఖ్యమంత్రి చంద్రబాబు తెలుగుదేశం నూటికి వేయి శాతం గెలుస్తుందని చెప్పడం, కౌంటింగ్ కు అప్రమత్తంగా ఉండాలని పార్టీ నేతలను ఆదేశించడం, నియోజకవర్గాల వారీ సమీక్షలు ప్రారంభించడంతో .. చంద్రబాబు.. ఈవీఎంలపై పోరాటంతో తెచ్చి పెట్టిన నిరుత్సాహం.. దూరం అయిన పరిస్థితి కనిపిస్తోంది.
