చిన్న సినిమాల‌కు ఓ ఊపు తెచ్చిన వాళ్ల‌లో ఎస్వీ కృష్ణారెడ్డి ఒక‌రు. క‌థాబ‌ల‌మున్న చిత్రానికి వినోదం జోడిస్తే ఎలా ఉంటుందో చూపించారాయ‌న. అలీని హీరోగా చేసి `య‌మ‌లీల` చేసింది ఆయ‌నే. మ‌హిళా పాత్ర‌ల‌కు ప్రాధాన్యం ఇచ్చి.. కుటుంబ ప్రేక్ష‌కుల్ని థియేట‌ర్ల‌కు ర‌ప్పించారు. ఆయ‌న మెగాఫోన్ ప‌ట్టి చాలాకాలం అయ్యింది. `య‌మ‌లీల 2` తీసి – ఆయ‌న రిలాక్స్ అయిపోయారు. ఇప్పుడు మళ్లీ మెగాఫోన్ ప‌ట్ట‌డానికి రెడీ అయ్యారు. అల్ల‌రి న‌రేష్ క‌థానాయ‌కుడిగా ఎస్వీ కృష్ణారెడ్డి ద‌ర్శ‌క‌త్వంలో ఓ చిత్రం రూపుదిద్దుకోనుంది. శోభారాణి నిర్మాత‌గా వ్య‌వ‌హ‌రిస్తారు. ఈ సినిమాలో మ‌రో క‌థానాయ‌కుడూ ఉంటాడ‌ని స‌మాచారం. ప్ర‌స్తుతం స్క్రిప్టు ప‌నులు జ‌రుగుతున్నాయి. త్వ‌ర‌లోనే ఓ అధికారిక ప్ర‌క‌ట‌న వెలువ‌డే అవ‌కాశం ఉంది. న‌రేష్ కెరీర్ చాలా దారుణంగా ఉంది. ఎస్వీ అయితే ఫామ్ కోల్పోయి చాలాకాలం అయ్యింది. కాక‌పోతే.. స‌రైన క‌థ ప‌ట్టుకుంటే క‌చ్చితంగా వీరిద్ద‌రూ ప్రేక్ష‌కుల్ని మైమ‌ర‌పించ‌గ‌ల‌రు. అప్ప‌ట్లో ఎస్వీ కృష్ణారెడ్డి – ఈవీవీ స‌త్య‌నారాయ‌ణ పోటాపోటీగా సినిమాలు తీసేవారు. న‌రేష్ హీరో అయ్యాక.. ఎస్వీ జోరు త‌గ్గింది. మరి… ఈవీవీ త‌న‌యుడికి ఎస్వీ కృష్ణారెడ్డి ఎలాంటి బ్రేక్ ఇస్తారో చూడాలి.
మళ్లీ మెగా ఫోన్ ప‌ట్ట‌నున్న వెట‌ర‌న్ డైరెక్ట‌ర్‌
