కాంగ్రెస్ స్ట్రాటజిస్ట్ , కోర్ టీం సభ్యుడు అయిన సునీల్ కనుగోలును అరెస్ట్ చేయడానికి తెలంగాణ పోలీసులు ప్రయత్నిస్తున్నారు. కవితపై లిక్కర్ క్వీన్ అంటూ కొన్ని సోషల్ మీడియా పోస్టులు పెట్టారు. ఈ పోస్టులను కాంగ్రెస్ సోషల్ మీడియా టీం పెట్టిందని ఆరోపిస్తూ పోలీసులు .. సునీల్ కనుగోలు టీం ఉన్న కార్యాలయంపై దాడి చేశారు. అందులో ఉన్న కంప్యూటర్లన్నీ ఎత్తుకెళ్లడంతో పాటు నలుగురు ఉద్యోగుల్ని అరెస్ట్ చేశారు. ఈ అంశంపై కాంగ్రెస్ పార్టీ భ గ్గు మంది పార్లమెంట్‌లోనూ తెలంగాణ పోలీసుల తీరును కాంగ్రెస్ ఎంపీలు ప్రస్తావించారు తెలంగాణ వ్యాప్తంగా నిరసనలు చేపట్టారు.
ఈ అంశంపై పోలీసులు వివరణ ఇచ్చారు. మహిళల్ని కించ పరిచేలా పోస్టింగులు పెట్టారని.. రాజకీయ విమర్శలు చేసుకోవచ్చు కానీ.. ఇలా మార్ఫింగ్‌లతో పోస్టింగ్‌లు పెట్టడం నేరమని చెప్పారు. ఫిర్యాదు అందిందని.. నోటీసులు కూడా ఇచ్చామని.. ఆ తర్వాతే అరెస్టు చేశామని పోలీసులు ప్రకటించారు. తాము అరెస్ట్ చేసిన ఉద్యోగులు.. సునీల్ కనుగోలు చెబితేనే మార్పింగ్‌లు చేశామని చెప్పారని.. ఆయనకూ నోటీసులు ఇస్తామని ప్రకటించారు.
ఈ అంశాన్ని కాంగ్రెస్ సీరియస్‌గా తీసుకుంది. ఏ పోస్టులు పెట్టారని కేసులు పెట్టారో.. అవే తాను కూడా పెడుతున్నానని ఎంపీ మాణిగం ఠాగూర్ సవాల్ చేసి అవే పోస్ట్ చేశారు. దమ్ముంటే తననూ అరెస్ట్ చేయాలన్నారు. ఈ అంశంపై కాంగ్రెస్ ఢిల్లీ స్థాయిలో పోరాటం చేస్తోంది. సునీల్ కనుగోలు ఢిల్లీ స్థాయిలో … కాంగ్రెస్ కు స్ట్రాటజీలు రూపొందిస్తున్నారు. రాహుల్ పాదయాత్రలో కీలకంగా ఉంటున్నారు. అందుకే అరెస్ట్ చేయాలనుకుంటున్నారని రేవంత్ రెడ్డి మండిపడుతున్నారు. ఇదంతా బీజేపీ వ్యూహంలో భాగమంటున్నారు.
నిజానికి టీఆర్ఎస్ నేతలు.. బీజేపీ సోషల్ మీడియా కార్యకర్తలు చేసే పోస్టింగ్‌లు.. మరీ అభ్యంతరకంగా ఉంటాయి. కవితను లిక్కర్ క్వీన్ అంటూ ఢిల్లీలో బీజేపీ నేతలు ఎన్ని సార్లు ట్రెండింగ్ చేశారో లెక్కలేదు. కానీ కాంగ్రెస్ పార్టీ పోస్టులు పెట్టగానే.. సునీల్ కనుగోలు ఆఫీస్‌ను సీజ్ చేసేసి.. కంప్యూటర్లు తీసుకెళ్లిపోయారు.
