ఆంధ్ర ప్రదేశ్ రాజధాని ని అమరావతి నుంచి విశాఖపట్నం తరలించాలనే ప్రతిపాదన మీద చర్చించడానికి ఆంధ్ర ప్రదేశ్ క్యాబినెట్ సమావేశం జరుగుతోంది. అటువైపు క్యాబినెట్ సమావేశం జరుగుతుండగానే ఇటు రాజధాని పరిసర గ్రామాల ప్రజలు రోడ్లు ఎక్కారు. పరిస్థితి చేజారి పోకుండా పోలీసులు ఇప్పటికే కొన్ని గ్రామాల్లో 144 సెక్షన్ విధించారు. అయినప్పటికీ వీటిని లెక్కచేయకుండా రైతులు మహిళల తో పాటు రాజధాని పరిసర గ్రామాల ప్రజలు రోడ్ల పై బైఠాయించి నిరసన వ్యక్తం చేస్తున్నారు. ఈ నేపథ్యంలో పలు చోట్ల పరిస్థితులు ఉద్రిక్తంగా మారాయి.
మందడం గ్రామంలో మహిళలు, రోడ్లపై బైఠాయించి నిరసనలు వ్యక్తం చేశారు. పలు చోట్ల టైర్లు కాల్చారు. కొన్ని చోట్ల పోలీసులతో వాగ్వాదానికి దిగుతున్నారు. ప్రభుత్వానికి వ్యతిరేకంగా పెద్ద ఎత్తున నినాదాలు చేస్తున్నారు. గొల్లపూడి లో తీవ్ర ఉద్రిక్తత నెలకొంది. మహిళలు రైతులు వేలాది గా జాతీయ రహదారి పైకి వచ్చారు. రాజధాని మార్చొద్దంటూ ధర్నా నిర్వహించారు. ప్రభుత్వానికి భూములిచ్చిన కొంతమంది రైతులు తాడు తీసుకొని వచ్చి రోడ్డు మీదే ఆత్మ హత్యకు ప్రయత్నించగా పోలీసులు వారిని అడ్డుకున్నారు. మహిళలు కంట తడి పెడుతూ, ప్రభుత్వాలను నమ్మి భూములు ఇస్తే రేపు పొద్దున మీరు కూడా ఇలాగే ఏడవ వలసి వస్తుందని విశాఖ వాసులకు సూచించారు. మరి కొంత మంది రైతులు, ఉద్దండ రాయని పాలెం వద్ద, తమను పెయిడ్ ఆర్టిస్ట్ లు అంటూ కథనాలు వేసిన మీడియా సంస్థ లకి చెందిన రిపోర్టర్ ల పై దాడి చేశారు.
మొత్తానికి రాజధాని పరిసర ప్రాంతాలు అట్టుడుకుతున్నాయి. మరి వీరి వేదన, కన్నీరు జగన్ కు కనిపిస్తాయా లేదా అనేది వేచి చూడాలి.
