ఎమ్మెల్యేలకు ఎర కేసులో బీఎల్ సంతోష్ ను నిందితుడిగా చేయాలని సిట్ చేసిన ప్రయత్నం విఫలమయింది. జగ్గు స్వామి, తుషార్ చెల్లపల్లి, శ్రీనివాస్ లను నిందితులుగా చేరుస్తూ సిట్ గతంలో ఏసీబీ కోర్టులో మెమో దాఖలు చేసింది. మొదట కేసు నమోదు చేసినప్పుడు వీరి పేర్లు లేవు. నందకుమార్, రామచంద్రభారతి, సింహయాజిల పేర్లు మాత్రమే ఉన్నాయి. తర్వాత కేసులో బీఎల్ సంతోష్, జగ్గూ స్వామి, తుషార్ అనే వారి కుట్ర ఉందని చెప్పి నోటీసులు జారీ చేశారు. ఎఫ్ఐఆర్ లో పేర్లు లేకుండా సీఆర్పీసీ 41నోటీసులు జారీ చేస్తున్నారని వారు కోర్టులో పిటిషన్లు వేశారు.
దీంతో సివీ ఆనంద్ నేతృత్వంలోని సిట్ పోలీసులు వారినీ నిందితులుగా చేరుస్తూ… ఏసీబీ కోర్టులో మెమో దాఖలు చేశారు. యితే అసలు ఈ కేసును సిట్ దర్యాప్తు చేయడం ఏమిటని.. చెల్లదని చెప్పి ఏసీబీ కోర్టు మెమోను తిరస్కరించింది. దీన్ని హైకోర్టులో సవాల్ చేశారు. వీరి పిటిషన్ ను కొట్టి వేసిన కోర్టు .. ఏసీబి కోర్టు తీర్పు ను సమర్దించింది. దీంతో వారు నిందితులు కాదని స్పష్టమైంది. ఇప్పటికే ఈ కేసు సీబీఐకి వెళ్లింది. సిట్ ను రద్దు చేసింది. ఇప్పుడు సీబీఐ కొత్తగా నమోదు చేసిన కేసులోనూ బీఎల్ సంతోష్ పేరు ఉండే అవకాశం లేదు.
బీజేపీలో చేరితే వంద కోట్లు ఇస్తానని.. నందకుమార్ ప్రలోభపెట్టారని.. నంద కుమార్ వెనుక బీజేపీ పెద్దలు ఉన్నారని రోహిత్ రెడ్డి ఫిర్యాదు మేరకే ప్రస్తుతం కేసు నడుస్తోంది. అందుకే ఈడీ కూడా కేసు నమోదు చేసింది. అయితే అసలు ఫామ్ హౌస్ కేసులో డబ్బుల చెలామణినే లేదని రోహిత్ రెడ్డి చెబుతున్నారు. అలాంటప్పుడు ఈడీ రాకూడదంటున్నారు. కోర్టుకు వెళ్లారు. అయితే కోర్టులో ఆయనకు అనుకూలంగా ఉత్తర్వులు రాలేదు. దీంతో ఈడీ విచారణ కొనసాగనుంది. దీంతో అటు సీబీఐ.. ఇటు ఈడీ విచారణ తీరు మారిపోనుంది.
