ప్ర‌తిరోజూ పండ‌గే తో మారుతి ఖాతాలో మ‌రో హిట్టు చేరిన‌ట్టైంది. తొలి రోజు టాక్ కాస్త అటూ ఇటూ ఊగినా, ఫ్యామిలీ ఆడియన్స్ అండ‌తో ఈ సినిమా గ‌ట్టెక్కేసింది. కామెడీ పండించ‌డంలో త‌న‌దైన మార్క్‌ని చూపించ‌గ‌లిగాడు మారుతి. ఈ వారం విడుద‌లైన మిగిలిన సినిమాలు డీలా ప‌డ‌డం కూడా కలిసొచ్చింది. మారుతి త‌దుప‌రి డి.వి.వి దానయ్య త‌న‌యుడితోనే. ఇది వ‌ర‌కే ఈ ప్రాజెక్టు ఖ‌రారైంది. అయితే.. ఇప్పుడు మారుతి త‌న నిర్ణ‌యాన్ని మార్చుకున్నాడ‌ని తెలుస్తోంది. డివీవీ దానయ్య సినిమాని హోల్డ్‌లో ఉంచి ఆ ప్లేసులో ఓ యువ హీరోతో సినిమా చేయాల‌ని ఫిక్స‌యిన‌ట్టు టాక్. ఆ సినిమా డివివి దానయ్య బ్యాన‌ర్‌లోనే ఉండ‌బోతున్న‌ట్టు తెలుస్తోంది. మారుతి క‌థ చెబుతానంటే నాని, విజ‌య్‌దేవ‌ర‌కొండ, శ‌ర్వానంద్ లాంటి హీరోలు విన‌డానికి సిద్ధంగా ఉన్నారు. మెగా కాంపౌండ్‌లోనూ మారుతికి మంచి గురి ఉంది. వీళ్ల‌లో ఒక‌రి చేత క‌థ ఓకే చేయించుకోవాల‌ని చూస్తున్నాడు. సెట్స్‌పైకి వెళ్ల‌డానికి కాస్త స‌మ‌యం తీసుకున్నా ఫ‌ర్వాలేదు గానీ, ఈ త‌రుణంలో కొత్త హీరోల‌తో ప్ర‌యోగాలు చేయ‌కూడ‌ద‌ని నిర్ణ‌యించుకున్నాడ‌ట. అందుకే దానయ్య త‌న‌యుడి సినిమాని హోల్డ్‌లో ఉంచిన‌ట్టు తెలుస్తోంది. హీరో ఎవ‌ర‌న్న‌ది ఫిక్స‌య్యాక… మారుతి త‌న కొత్త సినిమాని అధికారికంగా ప్ర‌క‌టిస్తాడు. అయితే హీరో ఓకే అయి కూడా, త‌దుప‌రి ప్రాజెక్టు మ‌రింత ఆల‌స్యం అవుతుంద‌నుకుంటే, అప్పుడు దాయ‌న్య త‌న‌యుడి సినిమా ఎలాగూ ఉంటుంది. అదీ మారుతి ప్లాను.
మారుతి ప్లాన్ మారిందా?
