పోయిన ఉగాది… `క‌రోనా` పుణ్యాన రుచీ ప‌చీ లేకుండా చ‌ప్ప‌గా సాగిపోయింది. ఈసారి క‌రోనా భ‌యాలు ఉన్నా… టాలీవుడ్ లో శోభ క‌నిపించింది. ప్ర‌తీ ఉగాదికీ.. టాలీవుడ్ లో కొత్త సినిమాలు మొద‌లు కావ‌డం రివాజు. ఈసారీ.. ఆ హంగామా క‌నిపించింది. ఒక రోజు ముందుగానే ర‌వితేజ `ఖిలాడీ` టీజ‌ర్ వ‌చ్చేసింది. అంతేకాదు.. ఈరోజే ర‌వితేజ కొత్త సినిమా ఒక‌టి.. ప‌ట్టాలెక్కింది. దాంతో పాటు.. కొన్ని చిన్న సినిమాలూ కొబ్బ‌రి కాయ కొట్టుకున్నాయి.
ఒక రోజు ముందు నుంచీ `ఉగాది` హ‌డావుడి ప్రారంభ‌మైంది. ఎన్టీఆర్ – కొర‌టాల కొత్త సినిమా అప్ డేట్ సోమ‌వార‌మే వ‌చ్చేసింది. ఉగాది రోజున.. బాల‌య్య `అఖండ` టైటిల్ ని ప్ర‌క‌టించారు. దాంతో పాటు ఓ టీజ‌రూ వ‌చ్చింది. ఈ ఉగాది బాల‌య్య ఫ్యాన్స్ కి అలా.. ప్ర‌త్యేకంగా మారిపోయింది. `ఆర్‌.ఆర్‌.ఆర్‌` నుంచి… కొత్త స్టిల్ ఒక‌టి విడుద‌ల చేశారు. ఎన్టీఆర్ – చ‌ర‌ణ్‌ల‌ను ఊరి జ‌నం గాల్లోకి ఎత్తేసిన పోస్ట‌ర్ అది. `ఆచార్య` నుంచి కూడా ఓ పోస్ట‌ర్ వ‌చ్చింది. ఈ సినిమాలో చ‌ర‌ణ్ కి జోడీ గా క‌నిపించ‌నున్న పూజా హెగ్డే ఈ పోస్ట‌ర్ ద్వారా తొలిసారి ప‌ల‌క‌రించింది. ఈరోజు `ట‌క్ జగదీష్` ట్రైల‌ర్ రావాల్సింది. కానీ సినిమా వాయిదా ప‌డ‌డంతో… ట్రైల‌ర్ నీ ఆల‌స్యంగా తీసుకొస్తున్నారు. అయితే.. ట‌క్ జగదీష్ నుంచి ఉగాది సంద‌ర్భంగా ఓ కొత్త పోస్ట‌ర్ వ‌చ్చింది. ఇలా… తెలుగు సంవ‌త్స‌రాదిన కొత్త సినిమాల ముచ్చ‌ట్లు వ‌రుస క‌ట్టాయి. ఈ యేడాదంతా.. ఇలానే సంద‌డి సంద‌డిగా సాగాల‌న్న‌ది సినీ అభిమానుల ఆకాంక్ష.
