రామ్ చ‌ర‌ణ్ సినిమా ఆగిపోలేదు

రామ్ చ‌ర‌ణ్ ఇప్పుడు శంక‌ర్ సినిమాతో బిజీగా ఉన్నాడు. ఆ త‌ర‌వాత బుచ్చిబాబుతో ఓ సినిమా చేస్తాడు. ఈలోగా క‌న్న‌డ ద‌ర్శ‌కుడు న‌ర్త‌న్ కూడా రెడీగా ఉన్నాడు. ముఫ్తీ సినిమాతో క‌న్న‌డ నాట ఓ సూప‌ర్ హిట్ కొట్టాడు న‌ర్త‌న్‌. తెలుగులో ఓ సినిమా చేయాల‌ని ఎప్ప‌టి నుంచో ప్ర‌య‌త్నాలు చేస్తున్నాడు. ఎట్ట‌కేల‌కు చ‌ర‌ణ్‌కి ఓ క‌థ చెప్పి ఒప్పించుకొన్నాడు. ఈలోగా.. క‌న్న‌డ స్టార్ శివ‌రాజ్ కుమార్‌తో న‌ర్త‌న్ ప్రాజెక్టు ఓకే అయ్యింది. అతి త్వ‌ర‌లో ఈ సినిమా ప‌ట్టాలెక్కుతుంది. దాంతో చ‌ర‌ణ్ తో న‌ర్త‌న్ సినిమా ఉంటుందా? లేదా? అనే డైలామా మొద‌లైంది. చ‌ర‌ణ్‌తో న‌ర్త‌న్ సినిమా ఉండ‌దంటూ జోరుగా ప్ర‌చారం జ‌రుగుతోంది. అయితే.. ఈ వార్త‌ల్లో నిజం లేద‌ని చ‌ర‌ణ్ స‌న్నిహిత వ‌ర్గాలు తెలిపాయి. న‌ర్త‌న్‌తో సినిమా ఉంటుంద‌ని, అయితే అది కాస్త ఆల‌స్యం అవుతుంద‌ని చెబుతున్నారు. శంక‌ర్ తో సినిమా పూర్త‌యిన వెంట‌నే బుచ్చిబాబు సినిమాని మొద‌లెడ‌తాడు చ‌ర‌ణ్‌. ఆ త‌ర‌వాతే.. న‌ర్త‌న్ సినిమా ఉంటుంది. ఈలోగా శివ‌రాజ్ కుమార్‌తో న‌ర్త‌న్ సినిమా అయిపోతుంది కూడా. సో.. చ‌ర‌ణ్ సినిమా ఆగిపోలేదన్న‌మాట‌.