చిలిపిక‌ళ్లు
చ‌లాకీ న‌ట‌న
మురిపించే మోము
క‌వ్వించే నవ్వు
మ‌త్తెక్కించే మాట
ఇవ‌న్నీ క‌లిస్తే శ్రీ‌దేవి..!
ఒక్క మాట‌లో చెప్పాలా…? సృష్టిలో ఉన్న సోయ‌గాన్నంతా వెండి తెర‌తో పొట్లం క‌డితే… శ్రీ‌దేవి!
‘అస‌లు భూలోకం ఇలాంటి సిరి చూసి ఉంట‌దా’ అంటూ శ్రీ‌దేవిని చూసి ఆశ్చ‌ర్య‌పోతే.. ఆ త‌ప్పు మీది కాదు.
పూల రెక్క‌లు, కొన్ని తేనె చుక్క‌లు
రంగించి, ఇలా బొమ్మ‌గా మార్చిన బ్ర‌హ్మదేవుడిదే!
ఆమె అందం చూసి థియేట‌ర్లు మెటిక‌లు విరుచుకున్నాయి. ఫ్లాష్ లైట్లు దిష్టి చుక్క పెట్టాయి. వెండితెర ఎర్ర తివాచీలా మారింది. నెంబ‌ర్ వ‌న్ కిరిటం ముచ్చ‌ట ప‌డుతూ.. ఆమె నెత్తినెక్కి కూర్చుంది. అదీ.. శ్రీ‌దేవి అంటే.
ప‌ద‌హారేళ్ల వ‌య‌సుకు గాలాలేసిన శ్రీ‌దేవి..
వ‌సంత కోకిల‌లో క‌న్నీళ్లు పెట్టించిన శ్రీ‌దేవి
ఆకు చాటు పిందె త‌డిసింది అంటూ రెచ్చ‌గొట్టిన శ్రీ‌దేవి
అబ్బ‌నీ తీయ‌నీ.. దెబ్బ కొట్టిన శ్రీ‌దేవి
హీరోయిన్ అనే అక్ష‌రాల్ని బంగారు వ‌న్నెలో ముంచిన శ్రీ‌దేవి..
మ‌న క‌ళ్ల ముందు నుంచి మాయ‌మైపోయి.. నేటికి స‌రిగ్గా యేడాది.
ఇంకెంతో జీవితం చూడాల్సిన వ‌య‌సులో
ఇంకెన్నో అద్భుతాలు చేయాల్సిన త‌రుణంలో
హ‌ఠాత్తుగా, ఎవ్వ‌రికీ చెప్ప‌కుండా మాయ‌మైపోయింది ఇంద్ర‌జ.
శ్రీ‌దేవి లేదు.. అనే మాటని న‌మ్మ‌డానికే సినీ ప్రియుల మ‌న‌సులు ఇంకా ఒప్పుకోవడం లేదు. ఇంకా ఇంకా ఆమె జ్ఞాప‌కాల్లో మునిగిపోతూ, ఆమెనే త‌ల‌చుకుంటూ, ఇంకా శ్రీ‌దేవి మ‌న‌మ‌ధ్యే ఉంది అనే ఊహ‌ల్లో, క‌ల‌ల్లో బ‌తికేస్తున్నారు.
ఎన్నో గొప్ప జ్ఞాప‌కాలు, ఇంకెన్నో గొప్ప క్ష‌ణాల్ని కానుక‌గా ఇచ్చిన శ్రీ‌దేవిని ఎప్ప‌టికీ మ‌ర్చిపోలేం..!
”వి మిస్ యూ శ్రీ‌దేవి”
(ఈరోజు శ్రీ‌దేవి తొలి వ‌ర్థంతి సంద‌ర్భంగా)
