విజయ్ దేవ‌ర‌కొండ ఇప్పుడు ఓ స్టార్‌. త‌న చుట్టూ తిరుగుతున్న ద‌ర్శ‌క నిర్మాత‌ల సంఖ్య రోజురోజుకీ ఎక్కువ అవుతోంది. ఈ డిమాండ్‌నీ, క్రేజ్‌నీ విజయ్ కూడా బాగానే వాడుకుంటున్నాడు. పెద్ద పెద్ద బ్యాన‌ర్‌ల‌తో సినిమాలు చేస్తున్నాడు. ఆయా చిత్రాలు విడుద‌ల‌కు ముందే లాభాల్ని తెచ్చుకుంటున్నాయి. ఇవ‌న్నీ గ‌మ‌నించే `కింగ్ ఆఫ్ ది హిల్స్‌` అనే ఓ సొంత నిర్మాణ సంస్థ‌ని స్థాపించాడు. అయితే ఇప్ప‌టి వ‌ర‌కూ ఈ బ్యాన‌ర్‌లో ఒక్క సినిమా కూడా చేయ‌లేదు.
ఇప్పుడు మాత్రం ప్లాన్ మార్చాడు దేవ‌ర‌కొండ. ఇక‌పై త‌న సొంత బ్యాన‌ర్‌లోనే సినిమాలు చేయ‌డానికి ఫిక్స‌య్యాడు. అందుకు త‌గిన ప్ర‌ణాళిక‌లు కూడా వేస్తున్నాడు. త‌న చేతిలో చాలా సినిమాలున్నాయి. వాటిలో చాలా మ‌ట్టుకు `గీత గోవిందం` ముందు తీసుకున్న అడ్వాన్సులే. పెళ్లి చూపులు స‌మ‌యంలో తీసుకున్న అడ్వాన్సుల‌కూ ఇప్పుడు సినిమాలు చేయాల్సివ‌స్తుంది. త‌న సినిమాల‌న్నీ పూర్త‌య్యేస‌రికి 2020 అవుతుంది. ఆ త‌ర‌వాత… సొంత బ్యాన‌ర్‌లోనే సినిమాలు చేయ‌బోతున్నాడ‌ట. పెద్ద సంస్థ‌లు వ‌స్తే… త‌న పారితోషికాన్ని మిన‌హాయించుకుని, వాటా దారుడిగా చేయ‌బోతున్నాడ‌ట. విజయ్ దేవ‌ర‌కొండ సోద‌రుడు కూడా `దొర‌సాని` సినిమాతో హీరో అవుతున్నాడు. ఆ సినిమా హిట్ట‌యితే… ఇక `కింగ్ ఆప్ ది హిల్స్‌` బ్యాన‌ర్‌లో ఓ సినిమా చేయ‌డానికి విజయ్ ప్లాన్ చేస్తున్నాడు. అందుకే… ఇప్పుడున్న ప్రాజెక్టుల‌ను వేగ‌వంతంగా పూర్తిచేయ‌మ‌ని ద‌ర్శ‌కుల్ని, నిర్మాత‌ల్నీ తొంద‌ర పెడుతున్నాడ‌ట. అందుకే విజయ్ సినిమాల‌న్నీ ఇప్పుడు వ‌రుస‌గా ప‌ట్టాలెక్క‌బోతున్నాయి.
